गॅस बिल भरण्याची बतावणी करुन वयोवृद्ध महिलेला गंडा

मुंबई क्राईम टाइम्स डॉट कॉम
19 सप्टेंबर 2025
मुंबई, – गॅस बिल भरण्याची बतावणी करुन एका वयोवृद्ध महिलेला लिंक पाठवून तिची फसवणुक झाल्याचा प्रकार जोगेश्वरी परिसरात उघडकीस आला आहे. सात ऑनलाईन व्यवहार अज्ञात सायबर ठगाने तिच्या बँक खात्यातून 9 लाख 94 हजाराचा अपहार करुन फसवणुक केली. याप्रकरणी ओशिवरा पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा नोंदवून तपास सुरु केला आहे. या गुन्ह्यांचा सायबर सेलचे अधिकारी संमातर तपास करत आहेत.

कांचन मसुरेकर ही 71 वर्षांची वयोवृद्ध तक्रारदार महिला तिचे पती विजयानंद विनायक मसुरेकर यांच्यासोबत जोगेश्वरी परिसरात राहते. या दोघांचा एका खाजगी बँकेत संयुक्त बँक खाते आहे. मंगळवारी 16 सप्टेंबरला तिच्या मोबाईलवर एक मॅसेज आला होता. त्यात तिच्या पाईपलाईन गॅस कनेक्शन आज बंद होणार असल्याचे सांगून तिला तातडीने पेमेंट करण्यास सांगण्यात आले होते. त्यामुळे तिने मॅसेजवरील मोबाईलवर संपर्क साधला असता समोरील व्यक्तीने तो तिच्या गॅस एजन्सीमधून बोलत असल्याचे सांगितले. त्याने तिला पेमेंट करण्यासाठी एक लिंक पाठविली होती. ही लिंक ओपन करुन तुम्ही पेमेंट करा. पेमेंट होताच आमच्या सिस्टीमला कळेल, मगच तिचे गॅस कनेक्शन बंद होणार नाही असे सांगितले. त्यामुळे तिने ती लिंक ओपन करुन पेमेंट करण्याचा प्रयत्न केला,

मात्र तिच्या मोबाईलवर ओटीपी येत नव्हता. त्यामुळे तिला बिल भरता आले नाही. काही वेळानंतर तिला एका अज्ञात व्यक्तीने कॉल करुन दुसर्‍या दिवशी पेमेंट करण्यास सांगितले. त्यामुळे तिने दुसर्‍या दिवशी तिचे गॅसच्या बिलाचे पेमेंट केले होते. त्यानंतर ती तिच्या कामात व्यस्त झाली होती. काही वेळानंतर तिच्या मोबाईलवर बँकेचे काही मॅसेज आले होते. त्यात सात ऑनलाईन व्यवहार झाले होते. या व्यवहारातून तिच्या बँक खात्यातून 9 लाख 94 हजार रुपये डेबीट झाले होते. गॅसचे बिल भरले नाही म्हणून पाईपलाईन गॅस कनेक्शन बंद होणार असल्याची भीती दाखवून अज्ञात सायबर ठगाने बोगस लिंक पाठवून तिच्या बँक खात्याची माहिती प्राप्त करुन ही ऑनलाईन फसवणुक केली होती.

हा प्रकार लक्षात येताच तिने ओशिवरा पोलिसांना घडलेला प्रकार सांगून अज्ञात सायबर ठगाविरुद्ध तक्रार केली होती. या तक्रारीची शहानिशा केल्यानंतर पोलिसांनी फसवणुकीसह आयटी कलमांतर्गत गुन्हा नोंदवून या ठगाचा शोध सुरु केला आहे. दरम्यान या गुन्ह्यांची वरिष्ठांनी गंभीर दखल घेत सायबर सेल पोलिसांना संमातर तपासाचे आदेश जारी केले आहेत. त्यामुळे ज्या बँक खात्यात फसवणुकीची रक्कम ट्रान्स्फर झाली आहे, त्या बँक खात्याची माहिती काढली जात असल्याचे पोलिसांनी सांगितले.