पीएफच्या रक्कमेसाठी निवृत्त शासकीय अधिकार्‍याची फसवणुक

मुंबई क्राईम टाईम्स डॉट कॉम
31 मे 2025
मुंबई, – पीएफच्या रक्कमेसाठी राज्याच्या बंदर विभागातून निवृत्त झालेल्या वयोवृद्ध अधिकार्‍याची अज्ञात सायबर ठगाने 1 कोटी 40 लाखांची फसवणुक केल्याचा धक्कादायक प्रकार अंधेरी परिसरात उघडकीस आला आहे. याप्रकरणी सायबर सेल पोलिसांनी फसवणुकीसह आयटी कलमांतर्गत गुन्हा नोंदवून या सायबर ठगांचा शोध सुरु केला आहे. या ठगांनी तक्रारदारांला एका खाजगी बँकेचा 1 कोटी 40 लाख रुपयांच्या धनादेशासह अर्थ मंत्रालयाचे काही पत्र पाठवून ही फसवणुक केल्याचे तपासात उघडकीस आले आहे.

73 वर्षांचे कृष्णकुमार रमाकांत पिंतळे हे अंधेरीतील विरा देसाई रोड, आझाद नगर क्रमांक दोनचे रहिवाशी आहे. गेल्या सात वर्षांपासून ते त्यांच्या पत्नीसोबत तिथे राहत असून महाराष्ट्र शासनाच्या बंदर विभागातून ते निवृत्त झाले आहेत. 14 मे 2023 रोजी त्यांना एका मोबाईलवरुन आलोक मेहता नावाच्या व्यक्तीने कॉल केला होता. त्याने तो दिल्लीतील ईपीएफओ कार्यालयातून बोलत असून त्यांची पीएफची काही रक्कम शिल्लक आहेत. ती रक्कम त्यांच्या बँक खात्यात ट्रान्स्फर केली जाणार असून त्यासाठी त्यांना 7 हजार 230 रुपये भरावे लागतील असे सांगितले. त्यामुळे त्यांनी त्याने दिलेल्या बँक खात्यात एनईएफटद्वारे ही रक्कम पाठवून दिली होती. त्यानंतर त्याने त्यांना प्रलंबित सुरक्षा व्यवहार आणि देखभाल शुल्क आदीसाठी त्यांच्याकडे आणखीन पैशांची मागणी केली होती. त्यामुळे त्यांनी पुन्हा त्याला काही रक्कम ट्रान्स्फर केली होती.

काही दिवसांनी अलोकने त्यांना पुन्हा कॉल केला. त्यांची फाईल तयार झाली असून ती फाईल पुढील कारवाईसाठी पाठवायची आहे, त्यासाठी त्यांना 3 लाख 80 हजार रुपये भरावे लागतील असे सांगितले. ही रक्कम जमा होताच त्यांना 63 लाख 8 हजार 620 रुपये मिळतील असे भारत सरकार, अर्थ मंत्रालयच्या बोगस लेटरलेहवर व्हॉटअपर पत्र पाठविण्यात आले होते. त्यामुळे त्यांनी ती रक्कम त्याला पाठवून दिली होती. 14 मे ते 12 एप्रिल 2024 या कालावधीत त्यांनी आलोकच्या सांगण्यावरुन विविध कारणासाठी त्याला 60 लाख रुपये दिले होते. मार्च 2024 रोजी त्यांना माही शर्मा नावाच्या एका महिलेने कॉल करुन ती सीबीआयमधून बोलत आहे. तिने अलोकने मोठा गैरव्यवहार केला असून त्याला सीबीआयने अटक केली आहे. त्यांची पीएफची फाईल तिच्याकडे आली असून तपास पूर्ण होताच त्यांना त्यांची संपूर्ण रक्कम मिळणार असल्याचे सांगितले.

त्यांचा विश्वास बसावा म्हणून तिने त्यांना एका खाजगी बँकेचा 1 कोटी 40 लाख 81 हजार 522 रुपयांचा धनादेश पाठविला होता. ही रक्कम त्यांच्या बँक खात्यात जमा होईल असे सांगून त्यांना आधी तीस टक्के आयकर तसेच एनओसी रक्कम भरावा लागणार असल्याचे सांगितले. 12 एप्रिल ते 30 नोव्हेंबर 2024 या कालावधीत तिच्यावर विश्वास ठेवून त्यांनी विविध कारणासाठी तिला वेगवेगळ्या बँक खात्यात ऐंशी लाख रुपये पाठविले होते. पीएफच्या रक्कमेसाठी आलोक मोहता आणि माही शर्मा यांनी त्यांच्याकडून आतापर्यंत 1 कोटी 40 लाख 81 हजार 522 रुपये घेतले होते, ही रक्कम त्यांनी विविध बँक खात्यात ट्रान्स्फर केली होती.

मात्र त्यांच्या बँक खात्यात पीएफची रक्कम जमा केली नव्हती. त्यामुळे त्यांनी त्यांच्या व्हॉटअपवर आलेल्या बोगस धनादेश, अर्थ मंत्रालयाचा लेटर आदी सर्व दस्तावेजाची शहानिशा केली होती. त्यात त्यांना ते सर्व दस्तावेज बोगस असल्याचे समजले. फसवणुकीचा हा प्रकार लक्षात येताच त्यांनी सायबर सेल पोलिसांत तक्रार केली होती. या तक्रारीची शहानिशा केल्यानंतर सायबर सेल पोलिसांनी अज्ञात व्यक्तीविरुद्ध फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा पोलिसांकडून चौकशी सुरु आहे. माही शर्मा आणि आलोक मेहता यांनी दिलेल्या बँक खात्याची माहिती काढण्याचे काम सुरु असल्याचे पोलिसांनी सांगितले.