लैगिंक अत्याचारासह पोक्सोच्या वॉण्टेड आरोपीस अटक

मुंबई क्राईम टाईम्स डॉट कॉम
30 नोव्हेंबर 2025
मुंबई, – लैगिंक अत्याचारासह पोक्सोच्या गुन्ह्यांतील एका वॉण्टेड आरोपीस जोगेश्वरी पोलिसांनी अटक केली. पंकज प्रकाश पांचाळ असे या 27 वर्षीय आरोपीचे नाव असून अटकेनंतर त्याला दिडोंशीतील पोक्सो कोर्टात हजर करण्यात आले होते. जामिनावर बाहेर येताच पंकज हा पळून गेला होता, गेल्या सहा वर्षांपासून तो सतत पोलिसांना गुंगारा देत होता, अखेर त्याला अटक करण्यात पोलिसांना यश आले आहे.

2019 साली पंकजसह इतर आरोपीविरुद्ध जोगेश्वरी पोलिसांनी 376, 376 (एन), (2), 34, भादवी सहकलम 4, 6, 8, 12 पोक्सो कलमांतर्गत गुन्हा दाखल केला होता. याच गुन्ह्यांत नंतर पंकजला पोलिसांनी अटक केली होती. न्यायालयीन कोठडीत असताना त्याने पोक्सो कोर्टात जामिनासाठी अर्ज केला होता. या अर्जावर सुनावणी होऊन त्याला कोर्टाने जामिन मंजूर केला होता. जामिनावर बाहेर येताच तो पळून गेला होता. न्यायालयीन प्रक्रियेदरम्यान तो सतत गैरहजर राहत होता.

जामिनानंतर तो स्वतची ओळख लपवून वेगवेगळ्या परिसरात लपत होता. सतत पोलिसांना गुंगारा देत होता. त्यामुळे त्याच्याविरुद्ध पोक्सो स्थासी अजामिनपात्र वॉरंट जारी केले होते. त्याच्या अटकेसाठी पोलिसांनी मोहीम सुरु होती. ही शोधमोहीम सुरु असताना पंकज हा जोगेश्वरी परिसरात येणार असल्याची माहिती पोलिसांना मिळाली होती.

या माहितीनंतर अतिरिक्त पोलीस आयुक्त परमजीतसिंह दहिया, सहाय्यक पोलीस आयुक्त संपतराव पाटील, वरिष्ठ पोलीस निरीक्षक इक्बाल शिकलगार यांच्या पथकातील सहाय्यक पोलीस निरीक्षक गणेश मिसाळ, पोलीस हवालदार कोरे यांनी नवलकरवाडी, एसआरए इमारतीजजवळ साध्या वेशात पाळत ठेवली होती. यावेळी तिथे पंकज आला असता त्याला पोलिसांनी अटक केली.

चौकशीत तोच वॉण्टेड आरोपी असल्याचे उघडकीस आले. जामिनावर बाहेर आल्यानंतर सहा वर्षांनी त्याला पुन्हा अटक करण्यात पोलिसांना यश आले होते. अटकेनंतर त्याला पोक्सो कोर्टात हजर करण्यात आले होते. यावेळी कोर्टाने त्याला न्यायालयीन कोठडी सुनावली आहे.