दिवसा रेकी करुन रात्री चोरी करणार्‍या टोळीचा पर्दाफाश

मुंबई क्राईम टाईम्स डॉट कॉम
30 नोव्हेंबर 2025
मुंबई, – दिवसा रेकी करुन रात्री वेळेस रिक्षा चोरी करुन चोरीच्या रिक्षातून घरफोडी करणार्‍या एका टोळीचा वनराई पोलिसांनी पर्दाफाश केला आहे. याच गुन्ह्यांत तीन आरोपींना पोलिसांनी अटक केली आहे. सचिन अशोक गवस, योगेश ईश्वर राठोड आणि तौफिक नौशाद खान अशी या तिघांची नावे असून या तिघांच्या अटकेने रिक्षा चोरीचे तीन तर घरफोडीचे दोन अशा पाच गुन्ह्यांची उकल करण्यात पोलिसांना यश ाअले आहे.

18 नोव्हेंबरला गोरेगाव येथे एक घरफोडीच्या गुन्ह्यांची नोंद झाली होती. अज्ञात चोरट्याने 130 किलो वजनाचे दोन मीटर लांबीचे आणि पाच इंच व्यासाचे भरीव लोखंडी रॉडची चोरी केली होती. याप्रकरणी प्रतिक नितीन मेहता यांच्या तक्रारीवरुन पोलिसांनी अज्ञात व्यक्तीविरुद्ध घरफोडीच्या गुन्हयांची नोंद करुन तपास सुरु केला होता. गेल्या काही दिवसांत चोरीसह घरफोडी आणि घरफोडीच्या गुन्ह्यांत लक्षणीय वाढ झाल्याने त्याची अतिरिक्त पोलीस आयुक्त शशिकुमार मीना, पोलीस उपायुक्त महेश चिमटे यांनी गंभीर दखल घेत स्थानिक पोलिसांना अशा आरोपीच्या अटकेसाठी विशेष मोहीम हाती घेण्याचे आदेश दिले होते.

या आदेशानंतर सहाय्यक पोलीस आयुक्त विजय भिसे, वरिष्ठ पोलीस निरीक्षक गिरीश बने, पोलीस निरीक्षक सुभाषचंद्र पोस्टुरे यांच्या मार्गदर्शनाखाली पोलीस उपनिरीक्षक इंद्रजीत भिसे, संग्राम गावडे, पोलीस हवालदार मिसाळ, राणे, पोलीस शिपाई नवलू यांनी आरोपींचा शोध सुरु केला होता. सीसीटिव्ही फुटेजची पाहणी केल्यानंतर आरोपी चोरीनंतर एका रिक्षातून पळून गेल्याचे दिसून आले होते. या रिक्षाचा शोध घेत असताना पोलिसांनी तांत्रिक माहितीवरुन तिघांना संशयित आरोपी म्हणून ताब्यात घेतले होते.

चौकशीत ते तिघेही चोरीसह घरफोडी आणि रिक्षा चोरीच्या गुन्ह्यांतील सराईत गुन्हेगार असल्याचे उघडकीस आले. त्यांनी वनराईच्या हद्दीत दोन घरफोडी, बोरिवली, गोरेगाव आणि अंधेरी येथून तीन रिक्षा चोरी केल्याची कबुली दिली. दिवसा रेकी करुन ते तिघेही रात्रीच्या वेळेस चोरीसह घरफोडी आणि रिक्षा चोरी करत असल्याचे उघडकीस आले. तपासात आलेल्या या माहितीनंतर तिन्ही आरोपींना पोलिसांनी अटक केली. त्यांच्याकडून चोरीचा मुद्देमाल लवकरच ताब्यात घेतले जाणार असल्याचे पोलिसांनी सांगितले. अटकेनंतर तिघांनाही बोरिवलीतील लोकल कोर्टात हजर करण्यात आले होते.