आरोपीच्या चेहरा पडताळणीचा अहवाल पोलिसांना प्राप्त

मुंबई क्राईम टाइम्स डॉट कॉम
३१ जानेवारी २०२५
मुंबई, – सिनेअभिनेता सैफ अली खानवर झालेल्या हल्ल्याप्रकरणी अटकेत असलेला शरीफुल इस्लाम शहजाद मोहम्मद राहिल्ला अमीर फकीर याच्या चेहरा पडताळणीचा अहवाल वांद्रे पोलिसांना प्राप्त झाला आहे. शरीफुलसह सीसीटिव्ही फुटेजचा चेहरा एकाच व्यक्तीचा अहवाल प्राप्त झाल्याने वांद्रे पोलिसांसाठी हा भक्कम पुरावा असल्याचे मानला जात आहे. शरीफुलविरुद्ध वांद्रे पोलिसांकडे इतर काही पुरावे असून या पुराव्याच्या आधारे त्याला जास्तीत जास्त शिक्षा व्हावी यासाठी पोलिसांचे प्रयत्न असल्याचे पोलिसांनी सांगितले.

जानेवारी महिन्यांत सिनेअभिनेता सैफ अली खान याच्या वांद्रे येथील फ्लॅटमध्ये शरीफुल चोरीच्या उद्देशाने घुसला होता. मात्र स्टाफ नर्सच्या आरडाओरडीनंतर त्याचा चोरीचा प्रयत्न फसला होता. पळून जाण्याच्या तयारीत असताना त्याला सैफअलीने पकडले होते. त्याच्या तावडीतून निसटून जाण्यासाठी त्याने सैफअलीवर चाकूने प्राणघातक हल्ला केला होता. या हल्ल्यात सैफअली हा जखमी झाला होता. हल्ल्यानंतर पळून जाताना आरोपीचे छायाचित्रे सीसीटिव्ही फुटेजमध्ये कैद झाले होते. याप्रकरणी गुन्हा दाखल होताच पळून गेलेल्या शरीफुलला चार दिवसांनी ठाण्यातून पोलिसांनी अटक केली होती. शरीफुलच्या अटकेनंतर हल्ला करणारा त्यांचा मुलगा आरोपी नसल्याचा आरोप त्याच्या वडिलांनी केला होता. सीसीटिव्ही फुटेजमधील आरोपीचे फुटेज आणि आरोपीचा चेहरा मॅच होत नसल्याचा आरोप झाल्याने पोलीस तपासावर संशय व्यक्त होत होते. त्यामुळे संबंधित सीसीटिव्ही फुटेजसह आरोपीचा फोटो फॉरेन्सिक लॅबमध्ये पाठविण्यात आला होता.

या फुटेजसह आरोपीच्या चेहर्‍याची तंत्रज्ञानाच्या मदतीने पडताळणी करण्यात आली होती. त्यात दोन्ही व्यक्ती एकच व्यक्ती असल्याचे उघडकीस आले आहे. त्यानंतर संबंधित लॅबकडून वांद्रे पोलिसांना एक अहवाल पाठविण्यात आला आहे. सीसीटिव्ही फुटेज आणि आरोपीचा चेहरा मॅच झाल्याने हा पोलिसांकडे भक्कम पुरावा मानला जात आहे. यापूर्वी पोलिसांनी शरीफुलचे कपडे, चाकूचा तुकडा, बॅगेसह इतर मुद्देमाल हस्तगत केला होता. त्याचे हाताचे ठसे यापूर्वीच मॅच झाले आहे. एकूणच शरीफुलविरुद्ध पोलिसांकडे भक्कम पुरावे असल्याचे बोलले जाते.