ऑनलाईन सेक्स रॅकेट चालविणार्‍या वेश्यादलाल महिलेस अटक
मोबाईलवर आर्थिक व्यवहार करुन ग्राहकांसोबत तरुणींना पाठवत होती
मुंबई क्राईम टाइम्स डॉट कॉम
13 ऑक्टोंबर 2025
मुंबई, – ऑनलाईन चालणार्‍या एका सेक्स रॅकेटचा पंतनगर पोलिसांनी पर्दाफाश केला. याच गुन्ह्यांत रिया नावाच्या एका 37 वर्षांच्या वेश्यादलाल महिलेस पोलिसांनी अटक केली आहे. तिच्या तावडीतून तीन तरुणींची सुटका करण्यात आली असून या तिघींनाही मानखुर्द येथील महिला सुधारगृहात पाठविण्यात आले आहे. रिया ही मोबाईलवर आर्थिक व्यवहार करुन मागणीनुसार ग्राहकासोबत तिच्या संपर्कात असलेल्या तरुणींना शारीरिक संबंधासाठी विविध हॉटेल, गेस्ट हाऊस आणि लॉजमध्ये पाठवत असल्याचे उघडकीस आले आहे. अटकेनंतर तिला लोकल कोर्टाने पोलीस कोठडी सुनावली आहे.
रिया ही अंबरनाथ येथे राहत असून तिच्या संपर्कात काही तरुणीसह महिला आहे. त्यांच्या मदतीने ती ऑनलाईन सेक्स चालवते. ग्राहकांच्या मागणीनुसार ती संबंधि तरुणीसह महिलांना विविध हॉटेलमध्ये शारीरिक संबंधासाठी पाठवत असल्याची माहिती पोलिसांना मिळाली होती. या माहितीची शहानिशा करण्यासाठी पोलिसांनी एका बोगस ग्राहकाच्या मदतीने तिला संपर्क साधला होता. या बोगस ग्राहकाने तिच्याकडे काही तरुणींची मागणी करताना या तरुणींना घेऊन घाटकोपर येथे येण्यास सांगितले होते. यावेळी रिया आणि बोगस ग्राहकांमध्ये मोबाईलवरुन सर्व आर्थिक व्यवहार ठरला होता.
ठरल्याप्रमाणे शनिवारी दुपारी तीन वाजता रिया ही तीन तरुणींसोबत घाटकोपर परिसरातील एका हॉटेलमध्ये आली होती. यावेळी तिचे बोगस ग्राहकासोबत आर्थिक व्यवहार सुरु असताना तिथे पंतनगर पोलिसांच्या एका विशेष पथकाने कारवाई केली होती. यावेळी रियासोबत असलेल्या तिन्ही तरुणींची सुटका करुन त्यांची चौकशी करण्यात आली होती. या चौकशीतून रिया ही सेक्स रॅकेट चालवत असल्याचे, ग्राहकाकडून त्यांना मिळणार्‍या काही रक्कमेचा हिस्सा स्वतजवळ आणि उर्वरित हिस्सा त्यांना देत असल्याचे उघडकीस आले. त्यानंतर रियाला पोलिसांनी ताब्यात घेतले होते.
तिच्याविरुद्ध भारतीय न्याय सहिता आणि पिटा कलमांतर्गत गुन्हा दाखल करुन तिच्यावर अटकेची कारवाई करण्यात आली होती. अटकेनंतर तिला दुसर्‍या दिवशी लोकल कोर्टात हजर करण्यात आले होते. यावेळी कोर्टाने तिला पोलीस कोठडी सुनावली आहे. सुटका केलेल्या तिन्ही तरुणींची मेडीकल करण्यात आली असून मेडीकलनंतर त्यांना महिला सुधारगृहात पाठविण्यात आले होते. या कारवाईत पोलिसांनी 95 हजार रुपयांचे वेगवेगळ्या कंपनीचे मोबाईल, 10 हजार 870 रुपयांची कॅश आणि 720 रुपयांच्या एका पर्ससह इतर मुद्देमाल जप्त केला आहे.
