शेअर गुंतवणुकीच्या बहाण्याने कॉलेज तरुणीची फसवणुक

मुंबई क्राईम टाइम्स डॉट कॉम
20 मे 2025
मुंबई, – चांगला परतावा देण्याचे आमिष दाखवून एका कॉलेज तरुणीला शेअरमार्केटमध्ये गुंतवणुक करण्यास प्रवृत्त करुन सुमारे 52 लाखांची फसवणुक केल्याप्रकरणी तीन ठगांना उत्तर प्रादेशिक विभागाच्या सायबर सेल पोलिसांनी अटक केली. मोहम्मद आसिफ मोहम्मद अस्लम रहिम, सुशांत सुरेश सपकट आणि युसूफ मोहम्मद शेख अशी या तिघांची नावे आहेत. फसवणुकीसाठी या तिघांनी सायबर ठगांना बँक खात्याची माहिती पुरविल्याचा आरोप आहे. अटकेनंतर या तिघांना बोरिवलीतील लोकल कोर्टाने पोलीस कोठडी सुनावलनी आहे. या गुन्ह्यांत इतर काही आरोपींचा सहभाग उघडकीस आला असून त्यांच्या अटकेसाठी पोलिसांनी विशेष मोहीम हाती घेतली आहे.

21 वर्षांची तक्रारदार तरुणी ही मालाड येथे राहत असून एका नामांकित कॉलेजमध्ये एम कॉमचे शिक्षण घेते. तिचे वडिल बोरिवलीतील एका बँकेत वरिष्ठ व्यवस्थापक म्हणून काम करतात. ती सोशल मिडीयावर अ‍ॅक्टिव्ह असून तिचे व्हॉटअप, फेसबुक, इंटाग्राम, टेलिग्रामवर अकाऊंट आहेत. गेल्या वर्षी फेब्रुवारी महिन्यांत ती गुगलवर शेअर ट्रेडिंगसंर्दीात सर्फिंग करत होती. यावेळी तिच्या मोबाईलनवर शेअर मार्केट ट्रेडिंगसंदर्भातील एक लिंक आली होती. त्यानंतर तिचा मोबाईल क्रमांक एका व्हॉटअप ग्रुपमध्ये अ‍ॅड करण्यात आल होते. या ग्रुपमध्ये विनोद नायर, त्याचा सेक्रेटरी सुशांत कुमार असे दोघेजण अ‍ॅडमिन होते. आठवडाभर ती व्हॉटअप ग्रुपमधील शेअरसंदर्भातील माहितीचे निरीक्षण करत होती. त्यातील माहिती खरी वाटल्याने तिने शेअर ट्रेडिंगसदंर्भात माहिती जाणून घेण्याचा प्रयत्न केला होता. यावेळी तिला सुशांतकुमारने शेअर गुंतवणुकीबाबत माहिती देताना तिला शेअरमध्ये गुंतवणुक केल्यास चांगला परतावा देण्याचे आश्वासन दिले होते.

त्याच्यावर विश्वास बसल्याने तिने संबंधित लिंकवर स्वतचे एक अकाऊंट उघडले होते. त्यानंतर तिने कंपनीच्या माध्यमातून शेअरमध्ये गुंतवणुक करण्यास सुरुवात केली. त्यानंतर तिला अन्य व्हॉटअप ग्रुपमध्ये अ‍ॅड करुन तिथेही तिला शेअरमध्ये गुंतवणुक करण्यास प्रवृत्त करण्यात आले होते. या गु्रपच्या कंपनीमार्फत गुंतवणुक केल्यास तिला आणखीन जास्त परतावा मिळेल असे सांगून तिचा विश्वास संपादन करण्यात आला होता. त्यामुळे तिने संबंधित सर्व कंपनीच्या माध्यमातून शेअरमध्ये गुंतवणुक केली होती. या गुंतवणुकीवर तिला चांगला फायदा होत असल्याचे दिसून आले. त्यामुळे तिने काही रक्कम स्वतच्या बँक खात्यात ट्रान्स्फर करण्याचा प्रयत्न केला, मात्र ही रक्कम ट्रान्स्फर झाली नव्हती. त्यामुळे तिने सुशांतकुमारच्या सांगण्यावरुन दहा टक्के पॅनेल्टी रक्कम म्हणून अडीच लाख रुपये भरले होते. तरीही तिला तिच्या बँक खात्यात पैसे ट्रान्स्फर करता आले नाही.

याबाबत तिने पुन्हा सुशांतकुमारकडे विचारणा केली असता त्याच्याकडून तिला काहीच प्रतिसाद मिळाला नाही. काही वेळानंतर त्याने तिला ग्रुपमधून बाहेर काढले होते. अशा प्रकारे शेअर गुंतवणुकीवर चांगला परतावा देतो असे सांगून सुशांतकुमार आणि विनोद नायर या दोघांनी तिला 8 फेब्रुवारी ते 21 मार्च 2024 या कालावधीत सुमारे 52 लाख रुपये विविध शेअरमध्ये गुंतवणुक करण्यास प्रवृत्त केले होते. मूळ रक्कमेसह परतावा न देता तिची फसवणुक केली होती. हाप्रकार उघडकीस येताच तिने सायबर हेल्पलाईनसह उत्तर प्रादेशिक सायबर सेलमध्ये तक्रार केली होती. या तक्रारीची शहानिशा केल्यानतर संबंधित सायबर ठगाविरुद्ध पोलिसांनी भारतीय न्याय सहिता आणि आयटी कलमांतर्गत गुन्हा नोंदवून तपास सुरु केला होता. ज्या बँक खात्यात ही रक्कम ट्रान्स्फर झाली होती, त्या बँक खात्याची माहिती काढून पोलिसांनी आरोपींचा शोध सुरु केला होता.

ही शोधमोहीम सुरु असताना दोन दिवसांपूर्वी मोहम्मद आसिफ, सुशांत सकपट आणि युसूफ शेख या तिघांना पोलिसांनी वेगवेगळ्या परिसरातून ताब्यात घेतले. चौकशीत या गुन्ह्यांत त्यांचा सहभाग उघडकीस आला आहे. या तिघांच्याच बँक खात्यात ही रक्कम ट्रान्स्फर झाली होती. त्यानंतर ती रक्कम त्यांनी एटीएमद्वारे काढून संबंधित सायबर ठगांना दिली होती. त्यासाठी त्यांना या सायबर ठगांकडून ठराविक रक्कमेचे कमिशन देण्यात आले होते. फसवणुकीसाठी त्यांनीच सायबर ठगांना विविध बँकेचे खाती पुरविल्याचे तपासात उघडकीस आले. तपासात हा प्रकार उघडकीस येताच या तिघांनाही पोलिसांनी अटक केली. अटकेनंतर तिन्ही आरोपींना सोमवारी दुपारी बोरिवलीतील लोकल कोर्टात हजर करण्यात आले होते. यावेळी कोर्टाने त्यांना पोलीस कोठडी सुनावली आहे.