दोनशे टक्के परताव्याच्या आमिषाने ट्रान्सपोर्ट व्यावसायिकाची फसवणुक

मुंबई क्राईम टाईम्स डॉट कॉम
31 मे 2025
मुंबई, – विविध कंपनीच्या शेअरमध्ये गुंतवणुकीवर दोनशे टक्के परताव्याचे आमिष दाखवून एका ट्रान्सपोर्ट व्यावसायिकाची अज्ञात सायबर ठगाने सुमारे अडीच कोटीची फसवणुक केल्याचा प्रकार अंधेरी परिसरात उघडकीस आला आहे. याप्रकरणी तक्रारदार व्यावसायिकाच्या तक्रारीवरुन सायबर सेल पोलिसांनी फसवणुकीसह आयटी कलमांतर्गत गुन्हा नोंदवून अज्ञात सायबर ठगाचा शोध सुरु केला आहे. बोगस अ‍ॅपच्या माध्यमातून ही फसवणुक झाल्याचे तपासात उघडकीस आले आहे.

आशिष प्रेम ओबेरॉय हे ट्रान्सपोर्ट व्यावसायिक असून त्यांची तार्वे लॉजिस्टिक प्रायव्हेट लिमिटे नावाची एक खाजगी ट्रान्सपोर्ट कंपनी आहे. सध्या ते त्यांच्या कुटुंबियांसोबत अंधेरीतील ओशिवरा परिसरात राहतात. एप्रिल 2025 रोजी त्यांना एका अज्ञात व्यक्तीने कॉल करुन तो एका खाजगी कंपनीचा प्रतिनिधी असल्याचे सांगितले होते. ही कंपनीत ऑनलाईन स्टॉक ट्रेडिंगचे काम करत असल्याचे सांगून त्यांचा मोबाईल क्रमांक एका व्हॉटअप ग्रुपमध्ये अ‍ॅड केला होता. या ग्रुपमध्ये शेअरमार्केट ट्रेडिंगची दैनदिन माहिती दिली जात होती. ग्रुपमधील सभासद चॅटद्वारे शेअरमध्ये गुंतवणुक करत होते. या गुंतवणुकीवर त्यांना भरघोस परतावा मिळत होता. त्यामुळे त्यांनीही शेअरमध्ये गुंतवणुकीचा निर्णय घेतला होता. यावेळी ग्रुप अ‍ॅडमिनने त्यांना एक लिंक पाठविली होती.

ही लिंक ओपन करुन त्यांनी स्वतच्या नावाने रजिस्ट्रेशन केले होते. या रजिस्ट्रेशननंतर त्यांना विविध शेअरची माहिती देताना ग्रुप अ‍ॅडमिनने गुंतवणुकीवर दोनशे टक्के परताव्याचे आमिष दाखविले होते. त्यामुळे त्यांनी टप्याटप्याने विविध शेअरमध्ये गुंतवणुक करण्यास सुरुवात केली होती. या गुंतवणुकीनंतर त्यांना त्यांच्या गुंतवणुकीवर किती रुपये फायदा झाला आहे हे अ‍ॅपवरुन दिसत होते. त्यामुळे त्यांना कंपनीच्या अ‍ॅपवर विश्वास बसला होता. कंपनीवर विश्वास ठेवून त्यांनी एप्रिल आणि मे 2025 या दोन महिन्यांत विविध शेअरमध्ये 2 कोटी 53 लाख 5 हजार रुपयांची गुंतवणुक केली होती. त्यात त्यांना प्रचंड नफा झाल्याचे दिसून येत होते.

मंगळवारी 27 मेला त्यांनी अ‍ॅपमधून काही रक्कम काढण्याचा प्रयतन केला, मात्र त्यांना ही रक्कम काढता आली नाही. त्यामुळे त्यांनी शेरॉन त्रिवेदी या ग्रुप अ‍ॅडमिनला संपर्क साधला असात तिने त्यांना दोन कोटी रुपये भरण्यास सांगितले. ही रक्कम ट्रान्स्फर केल्याशिवाय त्यांना त्यांची रक्कम ट्रान्स्फर करता येणार नाही असे सांगितले. फसवणुकीचा हा प्रकार लक्षात येताच त्यांनी ऑनलाईनसह सायबर सेल पोलिसांत तक्रार केली होती. या तक्रारीची शहानिशा केल्यानंतर संबंधित कंपनीसह ग्रुप अ‍ॅडमिनविरुद्ध पोलिसांनी फसवणुकीसह आयटी कलमांर्तत गुन्हा दाखल केला होता.

प्राथमिक तपासात या कंपनीने बोगस अ‍ॅप बनवून अनेकांना कंपनीच्या ग्रुपमध्ये अ‍ॅड केले होते. त्यांना चांगला परतावा देण्याचे आमिष दाखवून विविध शेअरमध्ये गुंतवणुक करण्यास प्रवृत्त केले. मात्र गुंतवणुकीसह परतावा न देता त्यांची फसवणुक केली होती. तक्रारदारांना अशाच प्रकारे दोनशे टक्के परताव्याचे आमिष दाखवून सुमारे अडीच कोटी रुपये गुंतवणुक करण्यास प्रवृत्त करण्यात आले होते. या गुन्ह्यांचा सायबर सेलने तपास सुरु केला असून फसवणुकीची रक्कम ज्या बँक खात्यात जमा झाले आहेत, त्या बँक खात्याची माहिती काढली जात असल्याचे पोलिसांनी सांगितले.