चांगला परतावा देण्याच्या आमिषाने व्यावसायिकाला गंडा

मुंबई क्राईम टाईम्स डॉट कॉम
3 जून 2025
मुंबई, – चांगला परतावा देण्याच्या आमिषाने एका व्यावसायिकाची अज्ञात सायबर ठगांनी 1 कोटी 44 लाख रुपयांना गंडा घातल्याचा प्रकार उघडकीस आला आहे. याप्रकरणी अज्ञात सायबर ठगाविरुद्ध मध्य सायबर सेल पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे. गेल्या काही दिवसांत शेअर गुंतवणुकीवर चांगला परताव्याच्या आमिषाने फसवणुकीच्या गुन्ह्यांत लक्षणीय वाढ झाली होती. विशेष म्हणजे सायबर सेल पोलिसांकडून सतत जनजागृती करुनही सायबर ठगांकडून अशा प्रकारची फसवणुक होत आहे.

52 वर्षांचे विद्यासागर लक्ष्मीराजन पसिकंटी हे लोअरपरेल येथील सनमिल रोड, सिद्धीविनायक निवारा अपार्टमेंटमध्ये राहत असून तयांचा स्वतचा व्यवसाय आहे. मार्च महिन्यांत त्यांचा मोबाईल क्रमांक एका व्हॉटअप ग्रुपमध्ये अ‍ॅड करण्यात आला होता. दुसर्‍या दिवशी त्यांना रिया रावत नावाच्या एका महिलेने शेअर खरेदी-विक्रीची माहिती सांगून त्यांना शेअरमध्ये गुंतवणुकीचा सल्ला दिला होता. या गुंतवणुकीवर त्यांना चांगला परतावा देण्याचे आमिष दाखविले होते. ग्रुपमध्ये 102 सभासभ होते, त्यापैकी बहुतांश सभासदांनी शेअरमध्ये गुंतवणुक केली होती, त्यात त्यांना चांगला फायदा झाला होता. त्यामुळे त्यांनीही शेअरमध्ये गुंतवणुकीचा निर्णय घेतला होता.

त्यांनी सुरुवातीला दहा हजाराची गुंतवणुक केली होती. या गुंतवणुकीवर त्यांना 832 रुपयांचा फायदा झाला होता. त्यामुळे त्यांनी 10 मार्च ते 5 मे 2025 या कालावधीत रिया रावतच्या सांगण्यावरुन विविध शेअरमध्ये 1 कोटी 44 लाखांची गुंतवणुक केली होती. या गुंतवणुकीवर त्यांना 16 कोटी 75 लाख रुपये नफा झाल्याचे दिसत होते. त्यामुळे त्यांनी काही रक्कम स्वतच्या बँक खात्यात ट्रान्स्फर करण्याचा प्रयत्न केला, मात्र ही रक्कम ट्रान्स्फर झाली नाही. त्यामुळे त्यांनी रियाला फोन करुन विचारणा केली होती. यावेळी तिने त्यांच्या रक्कमेवर 38 लाख 60 हजार रुपये सर्व्हिस टॅक्स लागेल. ही रक्कम जमा केल्यास त्यांच्या बँक खात्यात मूळ रक्कमेसह नफ्याची रक्कम ट्रान्स्फर होईल असे सांगितले. मात्र त्यांनी ही रक्कम भरण्यास नकार दिला होता. त्यानंतर रियाने त्यांना प्रतिसाद देणे बंद केले होते.

फसवणुकीचा हा प्रकार लक्षात येताच त्यांनी सायबर सेल पोलिसांना घडलेला प्रकार सांगून अज्ञात सायबर ठगाविरुद्ध तक्रार केली होती. या तक्रारीनंतर पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे. ज्या बँक खात्यात फसवणुकीची रक्कम ट्रान्स्फर झाली आहे, त्या बँक खात्याची माहिती काढून आरोपींच्या अटकेसाठी पोलिसांनी विशेष मोहीम हाती घेतली आहे.