शेअर गुंतवणुकीच्या बहाण्याने 1.19 कोटीची फसवणुक

मुंबई क्राईम टाईम्स डॉट कॉम
21 जून 2025
मुंबई, – शेअर गुंतवणुकीवर चांगला परतावा देण्याचे आमिष दाखवून एका वयोवृद्धाची अज्ञात सायबर ठगाने 1 कोटी 19 लाखांची फसवणुक केली. याप्रकरणी या वयोवृद्धाच्या तक्रारीवरुन मध्य प्रादेशिक विभागाच्या सायबर सेल पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा नोंदवून तपास सुरु केला आहे.

83 वर्षाचे वयोवृद्ध तक्रारदार दादर परिसरात राहतात. एका खाजगी कंपनीतून निवृत्त झाल्यानंतर त्यांचा सध्या शेअर आणि विविध गुंतवणुक योजनेत गुंतवणुक करण्याचा व्यवसाय आहे. 10 मार्च 2025 रोजी त्यांना सोशल मिडीयावर एका कंपनीची जाहिरात दिसली होती. त्यामुळे त्यांनी त्या जाहिरातीवर क्लिप केले होते. काही वेळानंतर त्यांना संबंधित कंपनीच्या ग्रुपमध्ये अ‍ॅड करण्यात आले होते. या ग्रुपमध्ये 92 सभासद होते. त्यात अश्विन पारेख नावाचा व्यक्ती सभासदांना नियमित शेअर खरेदी-विक्रीची माहितीसह कुठल्या शेअरमध्ये गुंतवणुक केल्यास त्यांना फायदा होईल याची माहिती देत होता. 2 मेला त्यांना विनिता पाटोडिया नावाच्या एका महिलेने संपर्क साधून त्यांना शेअरमध्ये गुंतवणुक करण्यास इच्छा आहे का याबाबत विचारणा केली होती.

गेल्या दिड ते दोन महिन्यांत ग्रुपमधील माहिती पाहिल्यानंतर त्यांनी शेअरमध्ये गुंतवणुकीस आपण इच्छुक असल्याचे सांगितले होते. त्यानंतर तिने त्यांचे रजिस्ट्रेशन केले होते. त्यानंतर त्यांनी या कंपनीच्या माध्यमातून शेअरमध्ये गुंतवणुक करण्यास सुरुवात केली होती. या गुंतवणुकीवर त्यांना चांगला फायदा होत होता. त्यामुळे तिने त्यांना आणखीन काही शेअरमध्ये गुंतवणुक करण्यास प्रवृत्त केले होते. तिच्यावर विश्वास ठेवून त्यांनी वेगवेगळ्या शेअरमध्ये गुंतवणुक केली होती. 2 मे ते 23 मे 2025 या कालावधीत त्यांनी वेगवेगळ्या शेअरमध्ये 1 कोटी 19 लाख 63 हजार रुपयांची गुंतवणुक केली होती. या गुंतवणुकीवर त्यांना प्रचंड फायदा झाला होता. त्यामुळे काही रक्कम स्वतच्या बँक खात्यात ट्रान्स्फर करण्यासाठी काय करावे लागेल याबाबतची माहिती त्यांनी काढण्याचा प्रयतन केला.

यावेळी तिने त्यांना दहा टक्के कमिशन रक्कम कंपनीच्या बँक खात्यात जमा करण्याचा सल्ला दिला. ही रक्कम जमा होताच त्यांची रक्कम त्यांच्या बँक खात्यात जमा होईल असे सांगितले. मात्र दहा टक्के कमिशन रक्कम भरण्यासाठी त्यांच्याकडे पैसे नव्हते. त्यांनी त्यांच्याकडील सर्व रक्कम शेअरमध्ये गुंतवणुक केली होती. त्यांनी तिच्याकडे विनंती केली होती, मात्र तिने कमिशनची रक्कम भरल्याशिवाय त्यांना पेसे मिळणार नाही असे सांगितले. यावेळी त्यांनी कमिशनची रक्कम भरण्यास नकार देताच तिने त्यांच्याशी संपर्क साधणे बंद केले होते. तिच्याकडून त्यांना काहीच प्रतिसाद मिळत नव्हता.

फसवणुकीचा हा प्रकार उघडकीस येताच त्यांनी स्थानिक पोलिसात तक्रार केली होती. या तक्रारीची शहानिशा केल्यानंतर संबंधित आरोपीविरुद्ध पोलिसांनी फसवणुकीसह आयटी कलमांतर्गत गुन्हा दाखल केला होता. या गुन्ह्यांचा तपास मध्य ्रप्रादेशिक सायबर सेल विभागाकडे वर्ग करण्यात आला आहे. त्यामुळे या गुन्ह्यांचा तपास सायबर सेलकडून सुरु आहे. ज्या बँक खात्यात त्यांनी ही रक्कम ट्रान्स्फर केली, त्या बँक खात्याची माहिती काढण्याचे काम सुरु असल्याचे पोलिसांनी सांगितले.