चांगल्या परताव्याच्या आमिषाने पाच कोटीचा अपहार करुन फसवणुक

मुंबई क्राईम टाइम्स डॉट कॉम
16 ऑक्टोंबर 2025
मुंबई, – चांगल्या परताव्याच्या आमिषाने एका खाजगी कंपनीच्या फायानान्स मॅनेजरची अज्ञात सायबर ठगांनी फसवणुक केली आहे. शेअरमध्ये गुंतवणुक करण्यास भाग पाडून सुमारे पाच लाखांना गंडा घालण्यात आल्याचा प्रकार उघडकीस आला आहे. याप्रकरणी अज्ञात सायबर ठगाविरुद्ध पश्चिम प्रादेशिक विभागाच्या सायबर सेल पोलिसांनी गुन्हा नोंदवून तपास सुरु केला आहे. शेअरमार्केटमध्ये गुंतवणुकीच्या नावाने फसवणुकीची मालिका सुरु असल्याचे या घटनेवरुन पुन्हा एकदा सिद्ध झाले आहे.

दिगंबर विजय फालक हे अंधेरीतील रहिवाशी असून एका खाजगी कंपनीत फायानान्स मॅनेजर म्हणून काम करतात. मार्च महिन्यांत त्यांना एका खाजगी कंपनीच्या व्हॉटअप ग्रुपमध्ये अ‍ॅड करण्यात आले होते. या ग्रुपमध्ये शेअरसंदर्भात माहिती शेअर करताना ग्रुप अ‍ॅडमीन सभासदांना वेगवेगळ्या शेअरमध्ये गुंतवणुक करण्यास प्रवृत्त करत होते. अशाच प्रकारे दिगंबर फालक यांनाही शेअरमध्ये गुंतवणुक करण्यास प्रवृत्त करण्यात आले होते. या गुंतवणुकीवर त्यांना चांगला परताव्याचे आमिष दाखविण्यात आले होते. त्यांच्या गुंतवणुकीवर त्यांना कशा प्रकारे फायदा होईल असे सांगून त्यांचा विश्वास संपादन केला जात होता.

त्यांच्या या आमिषाला बळी पडून त्यांनी विविध शेअरमध्ये 3 कोटी 58 लाख 81 हजार 223 रुपयांची गुंतवणुक केली होती. या गुंतवणुकीवर त्यांना 1 कोटी 36 लाख रुपये परत करण्यात आले होते. तसेच त्यांनी गुंतवणुक केलेल्या रक्कमेवर त्यांना सुमारे सात कोटीचा फायदा झाल्याचे कंपनीच्या दोन्ही वेबसाईटवर दिसून येत होते. मात्र ही रक्कम त्यांना त्यांच्या बँक खात्यात ट्रान्स्फर करता येत नव्हती. याबाबत विचारणा करुनही अ‍ॅडमिनकडून त्यांना प्रतिसाद मिळत नव्हता. त्यांना शेअरमध्ये आणखीन गुंतवणुक करण्यास सांगण्यात येत होते. त्यांनी नकार देताच त्यांना त्यांची परताव्यासह मूळ रक्कम मिळणार नाही असे ग्रुप अ‍ॅडमिनने सांगितले होते.

फसवणुकीचा हा प्रकार लक्षात येताच त्यांनी पश्चिम प्रादेशिक विभागाच्या सायबर सेलमध्ये तक्रार केली होती. या तक्रारीत त्यांनी संंबंधित कंपनीच्या ग्रुप अ‍ॅडमिनने त्यांना विविध शेअरमध्ये गुंतवणुक करण्यास प्रवृत्त करुन त्यांची मूळ रक्कमेसह परताव्याची रक्कम अशी पाच कोटी दोन लाख रुपयांची फसवणुक केल्याचा आरोप केला होता. या तक्रारीची शहानिशा केल्यानंतर संंबंधित सायबर ठग असलेल्या ग्रुप अ‍ॅडमिनविरुद्ध पोलिसाीं फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.