चांगला परताव्याचे आमिष दाखवून पती-पत्नीची फसवणुक

मुंबई क्राईम टाईम्स डॉट कॉम
28 नोव्हेंबर 2025
मुंबई, – चांगला परतावा देण्याचे आमिष दाखवून शेअरमध्ये गुंतवणुक करण्यास प्रवृत्त करुन पती-पत्नीची अज्ञात सायबर ठगांनी सुमारे 31 लाखांची फसवणुक केल्याचा प्रकार उघडकीस आला आहे. याप्रकरणी चार अज्ञात सायबर ठगांविरुद्ध पूर्व प्रादेशिक विभागाच्या सायबर सेल पोलिसांनी फसवणुकीसह आयटी कलमांतर्गत गुन्हा दाखल केला आहे. फसवणुकीची रक्कम ट्रान्स्फर झालेल्या संबंधित बँक खात्यासह खातेदारांची माहिती काम सुरु असल्याचे पोलिसांनी सांगितले.

55 वर्षांचे नवीन नेल्सन थॉमस हे त्यांच्या पत्नीसोबत घाटकोपर परिसरात राहत असून त्यांची मुलगी शिक्षणासाठी युएसएमध्ये असते. एका खाजगी कंपनीतून त्यांनी निवृत्त घेतली होती. त्यांच्यासह त्यांच्या पत्नीला शेअर ट्रेडिंगचे ज्ञान असल्याने त्यांनी शेअरमध्ये काही रक्कम गुंतवणुक केली होती. सप्टेंबरला त्यांना शेअर ट्रेडिंगसंदर्भात एक लिंक दिसली होती. ही लिंक ओपन केल्यानंतर त्यांना संबंधित ग्रुपमध्ये अ‍ॅड करण्यात आले होते. त्यात 90 पेक्षा अधिक सभासद होते.

या सर्वांनी त्यांच्या कंपनीमार्फत शेअरमध्ये मोठ्या प्रमाणात गुंतवणुक केली होती. त्यात त्यांना चांगला परतावा मिळाला होता. त्यामुळे त्यांच्यासह त्यांच्या पत्नीला ग्रुप अ‍ॅडमिनने शेअरमध्ये गुंतवणुक करण्याचा सल्ला दिला होता. या गुंतवणुकीवर त्यांना चांगला परतावा देण्याचे आमिष दाखविण्यात आले होते. ग्रुपमधील माहिती घेत असताना त्यांना त्यांच्यावर विश्वास बसला होता. त्यामुळे त्यांनी त्यांच्या कंपनीमार्फत शेअरमध्ये गुंतवणुकीचा निर्णय घेतला होता.

काही रक्कम गुंतवणुक केल्यानंतर त्यांना ठराविक रक्कमेचे कमिशन प्राप्त झाले होते. त्यामुळे त्यांनी आणखीन शेअरमध्ये गुंतवणुक करण्याचे ठरविले होते. सप्टेंबर ते नोव्हेंबर 2025 या कालावधीत नवीन थॉमस व त्यांच्या पत्नीने विविध शेअरमध्ये सुमारे 31 लाखांची गुंतवणुक केली होती. या गुंतवणुकीवर त्यांना चांगला फायदा झाला होता. त्यामुळे त्यांनी मूळ रक्कमेसह प्रॉफिटची रक्कम काढण्याची रिक्वेस्ट ग्रुप अ‍ॅडमीनला पाठविली होती. मात्र या रक्कमेसाठी त्यांना विविध टॅक्स भरावा लागेल.

ही रक्कम भरल्याशिवाय त्यांना त्यांची रक्कम काढता येणार नाही असे सांगण्यात आले. त्यानंतर त्यांनी त्यांना रिप्लाय देणे बंद केले होते. फसवणुकीचा हा प्रकार निदर्शनास येताच त्यांनी सायबर हेल्पलाईनसह स्थानिक पोलीस ठाणे आणि पूर्व सायबर सेल विभागात तक्रार केली होती. या तक्रारीची शहानिशा केल्यानंतर संबंधित चारही सायबर ठगाविरुद्ध पोलिसांनी फसवणुकीसह आयटीच्या विविध कलमांतर्गत गुन्हा दाखल केला होता. या गुन्ह्यांचा तपास नंतर पूर्व सायबर सेल विभागात सोपविण्यात आला आहे.