शेअरमध्ये चांगला परतावा देण्याच्या आमिषाने 35 कोटींना गंडा

मुंबई क्राईम टाईम्स डॉट कॉम
30 नोव्हेंबर 2025
मुंबई, – शेअरमध्ये चांगला परतावा देण्याच्या आमिषाने एका वयोवृद्ध जोडप्यांची सुमारे 35 कोटीची फसवणुक झाल्याचा प्रकार गोरेगाव परिसरात उघडकीस आला आहे. याप्रकरणी ग्लोब कॅपिटल मार्केट लिमिटेड कंपनीसह संचालकासह अधिकार्‍यांविरुद्ध वनराई पोलिसांनी बोगस दस्तावेज सादर करुन पैशांचा अपहार करुन फसवणुक केल्याप्रकरणी गुन्हा दाखल केला आहे. या गुन्ह्यांचा तपास सुरु असून कंपनीच्या संबंधित संचालकासह अधिकार्‍यांची लवकरच पोलिसांकडून चौकशी होणार आहे.

भरत हरकचंद शहा हे 72 वर्षांचे वयोवृद्ध व्यावसायिक असून ते त्यांची पत्नी भारती हिच्यासोबत माटुंगा परिसरात राहतात. त्यांचा परळ येथे एक गेस्ट हाऊस आहे. या गेस्ट हाऊसमध्ये कर्करोगी रुग्ण आणि त्यांच्या नातेवाईकांची राहण्याची व्यवस्था केली जाते. त्यांचे वडिल हरकचंद शहा यांचे 1994 साली निधन झाले होते. यावेळी त्यांचे कोट्यवधी रुपयांचे शेअर त्यांच्यासह त्यांच्या पत्नीला मिळाले होते. त्यांना शेअरमार्केटबाबत जास्त ज्ञान नव्हते. त्यांनी कधीही शेअरमार्केटमध्ये ट्रेडिंग केले नव्हते.

पाच वर्षांपूर्वी त्यांच्या शेअरबाबत त्यांच्या मित्रांकडून ग्लोब कॅपिटल मार्केट लिमिटेड कंपनीला माहिती मिळाली होती. त्यांनी त्यांना या शेअरमध्ये चांगला परतावा देण्याचे आमिष दाखवून त्यांचे ट्रेडिंग अकाऊंट सुरु केले होते. या ट्रेडिंग अकाऊंटचे सर्व अक्सेस स्वतकडे ठेवले होते. 2020 ते 2024 या कालावधीत त्यांच्या खात्याबाबत कंपनीकडून ट्रेडबाबत अनेक नोटीस प्राप्त झाले होते. याबाबत कंपनीने परस्पर त्यांच्या वतीने मेल पाठवून नॅशनल स्टॉक एक्सचेंजला रिप्लाय दिला होता. याबाबतची माहिती त्यांच्यापासून लपविण्यात ाअली होती. त्यामुळे त्यांनी ग्लोब कंपनीसह एनएसईला कारणे दाखवा नोटीसबाबत उत्तर दिले नव्हते.

कंपनीच्या संचालकासह इतर अधिकार्‍यांनी त्यांचा विश्वास संपादन करुन, त्यांना त्यांच्या शेअरमध्ये चांगला परतावा देतो असे सांगून त्यांच्या अज्ञानाचा फायदा घेतला होता. त्यांच्यासह त्यांच्या पत्नीला वारसा हक्काने मिळालेले शेअर गहाण ठेवून, चुकीच्या पद्धतीने शेअरमार्केटमध्ये ट्रेडिंग केले. या व्यवहारात त्यांना प्रचंड नुकसान होईल यासाठी प्रयत्न करुन त्यांना ईमेलद्वारे वार्षिक नफा-तोटा दर्शविणारी विवरणपत्र, प्रत्यक्ष असलेली विवरणपत्र यामध्ये प्रचंड दाखविणारे बोगस दस्तावेज बनविले होते. बोगस आकडेवारी दाखवून त्यांना नुकसान झाल्याचे दाखवून त्यांना 35 कोटीचे शेअर विक्री करण्यास प्रवृत्त करुन त्यांचे नुकसान केले होते.

हा प्रकार नंतर भरत शहा व त्यांची पत्नी भारती शहा यांच्या निदर्शनास आला होता. कंपनीचे मुख्य कार्यालय गोरेगाव परिसरात असल्याने भरत शहा यांनी वनराई पोलिसांत संबंधित कंपनीविरुद्ध वनराई पोलिसांत तक्रार केली होती. या तक्रारीची पोलिसांकडून शहानिशा करण्यात आली होती. त्यात कंपनीच्या संचालकासह इतर अधिकार्‍यांनी बोगस दस्तावेज बनवून भरत-भारती शहा यांना 35 कोटीचे शेअर विक्रीस प्रवृत्त करुन त्यांची फसवणुक केल्याचे उघडकीस आले होते. हा प्रकार उघडकीस येताच या कंपनीसह संंबंधितांविरुद्ध पोलिसांनी बोगस दस्तावेज बनवून पैशांचा अपहार करुन फसवणुक केल्याप्रकरणी गुन्हा दाखल केला आहे.