शेअर ट्रेडिंगच्या नावाने बँकेच्या अधिकारी महिलेची फसवणुक

मुंबई क्राईम टाईम्स डॉट कॉम
21 मार्च 2025
मुंबई, – शेअर ट्रेडिंगच्या नावाने एका नामांकित बँकेच्या सहाय्यक महाव्यवस्थापक असलेल्या महिला अधिकार्‍याची अज्ञात सायबर ठगाने फसवणुक केल्याची घटना जुहू परिसरात उघडकीस आली आहे. याप्रकरणी सायबर सेल पोलिसांनी फसवणुकीसह आयटी कलमांतर्गत गुन्हा नोंदवून या सायबर ठगांचा शोध सुरु केला आहे.

शिखा सौरभ कुमार ही 45 वर्षांची महिला तिच्या कुटुंबियासोबत जुहू परिसरात राहते. ती एका बँकेत सहाय्यक महाव्यवस्थापक म्हणून कामाला आहे. गेल्या वर्षी डिसेंबर महिन्यांत ती तिच्या घरी होती. यावेळी तिचा मोबाईल क्रमांक एका अज्ञात व्यक्तीने व्हॉटअप ग्रुपमध्ये अ‍ॅड केले होते. या गु्रुपमध्ये तिच्यासह इतर काही लोक सभासद होते. त्यात शेअरसंदर्भातील माहिती शेअर केली जात होती. कुठल्या शेअरमध्ये गुंतवणुक केल्यास चांगला फायदा होईल याबाबत ग्रुप अ‍ॅडमिन असलेले मिनी नायर आणि कृष्ण अय्यर हे माहिती देत होते. ही माहिती पाहताना तिने शेअरमध्ये गुंतवणुक करण्याची तयारी दर्शविली होती. यावेळी या दोघांनी तिला तिच्या मोबाईलवर एक अ‍ॅप डाऊनलोड करण्यास सांगितले होते. त्यात तिच्या नावासह वैयक्तिक आणि बँक खात्याची माहिती घेण्यात आली होती. त्यानंतर तिला विविध शेअरमध्ये गुंतवणुक करण्यासाठी पैसे ट्रान्स्फर करण्यास प्रवृत्त करण्यात आले होते.

10 डिसेंबर 2024 ते 28 जानेवारी 2025 या कालावधीत तिने शेअरमध्ये गुंतवणुकीसाठी विविध बँक खात्यात 1 कोटी 35 लाख रुपयांची गुंतवणुक केली होती. या गुंतवणुकीनंतर तिला संबधित अ‍ॅपवर तिच्या शेअरसह त्यावर तिला सहा कोटीचा फायदा झाल्याचे दिसून आले होते. त्यामुळे तिने तिची मूळ रक्कम स्वतच्या बँक खात्यात ट्रान्स्फर करण्याचा प्रयत्न केला होता, मात्र बरेच प्रयत्न करुनही तिला तिची रक्कम तिच्या बँक खात्यात ट्रान्स्फर करता आली नाही. याबाबत तिने ग्रुप अ‍ॅडमिनकडे विचारणा केल्यानंतर ते तिला विविध कारण सांगून टाळण्याचा प्रयत्न करत होते. नंतर त्यांच्याकडून तिला प्रतिसाद मिळणे बंद झाले होते.

फसवणुकीचा हा प्रकार लक्षात येताच तिने सायबर सेल पोलिसांना घडलेला प्रकार सांगून संबंधित ग्रुप अ‍ॅडमिनविरुद्ध तक्रार केली होती. या तक्रारीची शहानिशा केल्यानंतर पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा दाखल केला होता. या गुन्ह्यांचा तपास सुरु असून ज्या बँक खात्यात ही रक्कम ट्रान्स्फर झाली आहे, त्या बँक खात्याची माहिती काढण्याचे काम सुरु असल्याचे पोलिसांनी सांगितले. आरोपींच्या अटकेसाठी दोन ते तीन पथकाची नियुक्ती करण्यात आली असून या पथकाला मुंबईसह मुंबईबाहेर पाठविण्यात आले आहे.

व्हिडीओकॉनच्या निवृत्त कर्मचार्‍याची बारा लाखांची फसवणुक
शेअर ट्रेडिंगच्या नावाने व्हिडीओकॉन इंडस्ट्रिज लिमिटेडच्या एका माजी कर्मचार्‍यांची अशाच प्रकारे सायबर ठगाने फसवणुक केली. 58 वर्षांचे तक्रारदार अंधेरी येथे राहत असून व्हिडीओकॉन कंपनीतून निवृत्त झाले आहे. त्यांना एका व्हॉटअप ग्रुपमध्ये अ‍ॅड करुन शेअरमध्ये गुंतवणुक करण्यास प्रवृत्त करण्यात आले होते. चांगला परताव्याच्या आमिषाला बळी पडून त्यांनी शेअरमध्ये बारा लाखांची गुंतवणुक केली. या गुंतवणुकीवर त्यांना चांगला फायदा झाल्याचे दिसून आले. त्यामुळे त्यांनी काही रक्कम काढण्याचा प्रयत्न केला, मात्र त्यासाठी त्यांच्याकडे अज्ञात सायबर ठगाने पाच लाखांची मागणी सुरु केली होती. ही रक्कम दिल्याशिवाय त्यांना त्यांची रक्कम मिळणार नाही असे सांगितले. त्यांनी पाच लाख रुपये ट्रान्स्फर करण्यास नकार दिला होता. त्यानंतर त्यांनी त्यांना प्रतिसाद देणे बंद केले होते. फसवणुकीचा हा प्रकार लक्षात येताच त्यांनी सायबर सेल पोलिसात तक्रार केली होती. या तक्रारीनंतर पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा दाखल केला आहे.