तीन अपघातात बारा वर्षांच्या मुलासह तिघांचा मृत्यू

मुंबई क्राईम टाइम्स डॉट कॉम
७ नोव्हेंबर २०२४
मुंबई, – मुंबई शहरात गेल्या २४ तासांत तीन वेगवेगळ्या अपघाताच्या घटनेत बारा वर्षांच्या एका मुलासह तिघांचा मृत्यू झाला. मृतांमध्ये अबूजर बिलाल अन्सारी, श्रीराज प्रकाश माने आणि रोहित गौतम यांचा समावेश आहे. साकिनाका, अंधेरी आणि कांदिवली परिसरात तिन्ही अपघात झाल्याचे पोलिसांनी सांगितले. याप्रकरणी ओशिवरा, साकिनाका आणि समतानगर पोलिसांनी तीन स्वतंत्र अपघाताची नोंद करुन तपास सुरु केला आहे. साकिनाका येथे अबूजर या बारा तर कांदिवलीत श्रीराज माने या अठरा वर्षांच्या मुलाच्या अपघाती निधनाने स्थानिक रहिवाशांमध्ये प्रचंड शोककळा पसरली आहे.

पहिला अपघात मंगळवारी ५ नोव्हेंबरला दुपारी साडेबारा वाजता साकिनाका येथील ९० फिट रोड, मॅक्सेस सिनेमागृहाजवळील रस्त्यावर झाला. याच परिसरात राजियाबानो बिलाल अहमद अन्सारी ही महिला तिच्या कुटुंबियांसोबत राहते. मृत अबूजर हा तिचा बारा वर्षांचा मुलगा असून तो सध्या शिक्षण घेत होता. मंगळवारी दुपारी तो त्याच्या काकांना जेवणाचा डब्बा घेऊन जात होता. दुपारी साडेबारा वाजता मॅक्सेस सिनेमागृहासमोरुन रस्ता क्रॉस करत होता. यावेळी भरवेगात जाणार्‍या एका टेम्पोने त्याला धडक दिली होती. त्यात तो गंभीररीत्या जखमी झाला होता. त्याला आधी राजावाडी आणि नंतर सायन हॉस्पिटलमध्ये दाखल करण्यात आले होते. तिथे उपचारादरम्यान रात्री आठ वाजता त्याचा मृत्यू झाला. याप्रकरणी साकिनाका पोलिसांनी अपघाताची नोंद करुन आरोपी टेम्पोचालकास अटक केली.

दुसरी अपघाताची घटना घटना कांदिवली परिसरात घडली. श्रीराज माने हा कांदिवलीतील सिंग इस्टेट अंजिक्य तारा सोसायटीमध्ये त्याच्या कुटुंबियासोबत राहत होता. वसईतील एका नामांकित कॉलेजमध्ये तो शिक्षण घेत होता. बुधवारी सकाळी तो नास्ता कण्यासाठी त्याच्या बाईकवरुन ठाकूर कॉम्प्लेक्स येथून जात होता. यावेळी त्याच्या बाईकला दूधाच्या टँकरने धडक दिली. त्यात तो गंभीररीत्या जखमी झाला. जखमी झालेल्या श्रीराजला तातडीने जवळच्या शताब्दी हॉस्पिटलमध्ये दाखल करण्यात आले होते. तिथे त्याला डॉक्टरांनी मृत घोषित केले. अपघातानंतर टँकरचालक पळून गेला होता. त्याच्याविरुद्ध समतानगर पोलिसांनी गुन्हा दाखल केला असून त्याचा पोलिसांकडून शोध सुरु आहे.

तिसरी अपघाताची घटना बुधवारी सकाळी अंधेरीतील बँक रोडवर घडली. रोहित गौतम हा मूळचा बिहारचा रहिवाशी असून सघ्या तो अंधेरीतील आझाद नगर मेट्रो स्थानकाजवळ राहत होता. बुधवारी सकाळी तो बँक रोडवर आला होता. यावेळी एका चालकाने डंपर रिव्हर्स घेताना रोहितला डंपरची धडक लागली. त्याच्या अंगावर डंपर गेल्याने तो गंभीररीत्या जखमी झाला होता. अपघाताची माहिती मिळताच ओशिवरा पोलिसांनी घटनास्थळी धाव घेतली होती. जखमी झालेल्या रोहितला जवळच्या शासकीय हॉस्पिटलमध्ये दाखल करण्यात आले. तिथे त्याला डॉक्टरांनी मृत घोषित केले. या अपघाताला जबाबदार असलेल्या मोहम्मद साबीर मोहम्मद सुलेमान या चालकाला नंतर ओशिवरा पोलिसांनी अटक केली. त्याला शुक्रवारी अंधेरीतील लोकल कोर्टात हजर केले जाणार आहे.