पोलीस शिपायावर हल्ला करुन शिवीगाळ करणे महागात पडले

मुंबई क्राईम टाईम्स डॉट कॉम
१८ फेब्रुवारी २०२५
मुंबई, – नशापान करणार्‍या तरुणांवर कारवाई करताना पोलीस शिपायावर हल्ला करुन अश्‍लील शिवीगाळ करणे एका महिलेसह दोघांना चांगलेच महागात पडले आहे. या तरुणांवर कारवाई करण्यापासून अटकाव करुन सरकारी कामात अडथळा आणल्याप्रकणी दोघांविरुद्ध ट्रॉम्बे पोलिसांनी गुन्हा दाखल केला आहे. अंबादास रामा खंडागळे आणि आशा अंबादास खंडागळे अशी या दोघांची नावे आहेत. या गुन्ह्यांत दोघांनाही पाहिजे आरोपी दाखविण्यात आले असून त्यांचा पोलिसांकडून शोध सुरु आहे. ही घटना सोमवारी रात्री दिड वाजता ट्रॉम्बे येथील पांजरापोळ, रमेश तेंडुलकर मैदानात घडली.

प्रविण शिवाजी पाटील हे नवी मुंबईतील नेरुळ, शिवडु परिसरात राहत असून ट्रॉम्बे पोलीस ठाण्यात पोलीस शिपाई म्हणून कार्यरत आहेत. सोमवारी रात्री ते बीट मार्शल कर्तव्यावर हजर होते. रात्री परिसरात गस्त घालत असताना त्यांना रमेश तेंडुलकर मैदानात काहीजण नशापान करताना दिसून आले. त्यामुळे त्यांनी तिथे बसलेल्या तरुणांना तेथून घरी जाण्यास सांगितले होते. त्याचा राग आल्याने तीन तरुणांनी त्यांनाच शिवीगाळ करुन दादागिरी करण्याचा प्रयत्न केला होता. त्यामुळे त्यांनी या तिघांनाही पकडण्याचा प्रयत्न केला. मात्र ते तिघेही पळू लागले. त्यामुळे त्यांनी त्यांचा पाठलाग केला. म्हाडा इमारतीमध्ये पळून गेल्यानंतर अंबादास आणि आशा खंडागळे यांनी त्यांना अश्‍लील शिवीगाळ करुन त्यांच्या दिशेने लाकडी बांबू फेंकून मारला. तसेच या तरुणांना ताब्यात घेण्यापासून त्यांना अटकाव करुन सरकारी कामात अडथळा आणला होता.

ही माहिती मिळताच ट्रॉम्बे पोलिसांनी घटनास्थळी धाव घेतली होती. यावेळी पोलीस शिपाई प्रविण पाटील यांना अश्‍लील शिवीगाळ करुन लाकडी बांबूने हल्ला करण्याचा प्रयत्न करणे, आरोपींना अटकाव करण्यापासून रोखून सरकारी कामात अडथळा आणल्याप्रकरणी अंबादास आणि आशा खंडागळे या दोघांविरुद्ध पोलिसांनी गुन्हा दाखल केला होता. याच गुन्ह्यांत दोघांनाही पाहिजे आरोपी दाखविण्यात आले असून त्यांचा पोलिसांकडून शोध सुरु आहे.