व्हिसासाठी घेतलेल्या पैशांचा अपहार करुन फसवणुक

मुंबई क्राईम टाइम्स डॉट कॉम
23 जानेवारी 2026
मुंबई, – व्हिसासाठी घेतलेल्या सुमारे सव्वाआठ लाखांचा अपहार करुन एका व्यावसायिकासह त्यांच्या डॉक्टर मित्राची फसवणुक झाल्याचा प्रकार अंधेरी परिसरात उघडकीस आला आहे. याप्रकरणी श्री साई ट्रॅव्हेल्स कंपनीचे मालक संदीप जैस्वाल याच्याविरुद्ध एमआयडीसी पोलिसांनी फसवणुकीचा गुन्हा दाखल केला आहे. संदीप हा मूळचा पुण्याचा हिजवाडी, वाकडचा रहिवाशी असून त्याची पोलिसांकडून लवकरच चौकशी होणार आहे.

49 वर्षांचे तक्रारदार व्यावसायिक असून ते अंधेरीतील मरोळ परिसरात राहतात. त्यांची स्वतची एक खाजगी कंपनी असून त्यांच्यासह त्यांची पत्नी कंपनीत संचालक म्हणून काम पाहतात. त्यांच्या परिचित एक डॉक्टर असून त्यांच्यसासोबत त्यांचे गेल्या सहा वर्षांपासून कौटुंबिक संबंध होते. ते त्यांच्या कुटुंबियांसोबत व्हिएतनामला फिरायला जाणार होते, त्यामुळे त्यांनी त्यांना त्यांच्यासोबत येण्यास सांगितले होते. श्री साई ट्रॅव्हेल्स कंपनीने ही ट्रिप आयोजित केल्याचे सांगून त्यांनी त्यांना कंपनीचे मालक संदीप जैस्वाल यांचा मोबाईल क्रमांक दिला होता. त्यामुळे त्यांनी संदीपला फोन करुन ट्रिपची माहिती जाणून घेण्याचा प्रयत्न केला.

यावेळी त्याने त्यांना त्यांच्या डॉक्टर मित्रांसोबत त्यांच्या कुटु्रंबियांची बुकींग करुन देत असल्याचे सांगितले. त्यामुळे त्यांनी त्यांच्यासह त्यांच्या पत्नीचा पासपोर्ट संदीपकडे पाठवून दिला होता. ठरल्याप्रमाणे संदीपला त्यांनी त्यांच्यासह डॉक्टर मित्रासाठी व्हिसासाठी सुमारे सव्वाआठ लाखांचे पेमेंट केले होते. नोव्हेंबर 2025 रोजी त्यांनी संदीपला कॉल केला होता, यावेळी त्याने अद्याप व्हिसा मिळाला नसून लवकरच व्हिसा मिळेल असे सांगितले. प्रत्येक वेळेस तो व्हिसाबाबत विविध कारण सांगून त्यांना टाळण्याचा प्रयत्न करत होता.

हा प्रकार संशयास्पद वाटताच त्यांनी इतर ट्रॅव्हेल्स कंपनीकडे व्हिसाबाबत चौकशी केली होती. यावेळी त्यांनी त्यांना वीस दिवसांत व्हिसा मिळत असल्याचे सांगितले. याबाबत त्यांनी संदीपकडे विचारणा करुन व्हिसासाठी दिलेल्या पैशांची मागणी सुरु केली होती. मात्र त्याने त्यांना पैसे परत केले नाही. संदीपने व्हिसासाठी घेतलेल्या पैशांचा अपहार करुन त्यांची फसवणुक केली होती. त्यामुळे त्यांनी घडलेला प्रकार एमआयडीसी पोलिसांना सांगून त्याच्याविरुद्ध तक्रार केली होती. या तक्रारीची शहानिशा केल्यानंतर संदीप जैस्वालविरुद्ध पोलिसांनी अपहारासह फसवणुकीचा गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.