डिजीटल अरेस्टची भीती दाखवून वयोवृद्ध महिलेची फसवणुक

मुंबई क्राईम टाईम्स डॉट कॉम
22 जून 2025
मुंबई, – डिजीटल अरेस्टची भीती दाखवून एका वयोवृद्ध महिलेची ट्राय आणि सीबीआयचे अधिकारी असल्याची बतावणी करणार्‍या सायबर ठगाने फसवणुक केली. बँकेत ठेवलेले तीस तोळे गहाण ठेवून कर्ज काढण्यास सांगून तिला दिलेल्या बँक खात्यात ही रक्कम ट्रान्स्फर करण्यास प्रवृत्त करण्यात आले. प्रवासादरम्यान वर्तमानपत्रात वाचण्यात आलेल्या डिजीटल अरेस्टच्या फसवणुकीचे वृत्तानंतर तिला तिची फसवणुक झाल्याचे निदर्शनास आले आणि तिने सायबर सेल पोलिसांना घडलेला प्रकार सांगितला. तिच्या तक्रार अर्जानंतर संबंधित सायबर ठगाविरुद्ध मध्य प्रादेशिक सायबर सेल पोलिसांनी गुन्हा नोंदवून तपास सुरु केला आहे.

कानन सौरभ दानी ही 61 वर्षांची तक्रारदार वयोवृद्ध महिला वरळी येथे राहते. तिचे पती सौरभ दानी यांचा आयडी सर्व्हिसचा व्यवसाय आहे. 3 जूनला तिला एका अज्ञात व्यक्तीने कॉल करुन तो ट्रायमधून बोलत असल्याचे सांगितले. तिच्या नावाने घेण्यात आलेल्या सिमकार्डवरुन काही महिलांना अश्लील मॅसेज पाठवून त्यांचा मानसिक शोषण केले जात आहेत. याबाबत अनेक महिलांच्या तक्रारी पोलिसांना प्राप्त झाले असून कुलाबा पोलीस ठाण्यात तिच्याविरुद्ध गुन्हा दाखल झाला आहे. यावेळी त्याने सांगितलेल्या मोबाईल क्रमांकाचे सिमकार्ड तिने घेतले नसल्याचे तिने सांगितले. तरीही तो काहीही ऐकण्याच्या मनस्थितीत नव्हता.

तिच्याविरुद्ध गुन्हा दाखल झाला असून या गुन्ह्यांचा कुलाबा पोलिसांसह सायबर सेल पोलिसांकडून तपास सुरु आहे. या गुन्ह्यांचे तपास अधिकारी राजीव सिन्हा असल्याचे सांगून तिचा कॉल त्याला ट्रान्स्फर केला होता. यावेळी राजीवने तो सीबीआय अधिकारी असल्याचे सांगून तिच्या नावाने एका बँकेत खाते उघडण्यात आले आहे. त्यात मनी लॉड्रिंगची रक्कम जाम झाली आहे. त्यामुळे तिच्याविरुद्ध मनी लॉड्रिंगप्रकरणीही गुन्हा दाखल झाला आहे. त्याने तिला व्हिडीओ कॉल करुन तोच सीबीआय अधिकारी असल्याचे भासविण्याचा प्रयत्न केला. व्हिडीओ कॉलवर सीबीआयचा लोगो दिसत असल्याने तिला तो सीबीआय अधिकारी असल्याचे वाटले. त्याने तिला नरेश गोयलला ओळखता का. त्याने 47 कोटीचा मनी लॉड्रिंग घोटाळा केला आहे. त्यातील काही रक्कम तिच्या नावाने उघडण्यात आलेल्या बँक खात्यात जमा झाले आहे. याच गुन्ह्यांत काही आरोपींना अटक झाली असून त्यांच्या चौकशीतून तिचे नाव समोर आले आहे.

यावेळी तिने त्यांची काहीतरी गैरसमज झाला आहे. तिच्या नावाने संबंधित बँकेत कुठलेही खाते नाही असे सांगितले. त्यानंतर त्याने तपास पूर्ण करुन त्यांचे नाव काढण्याचे आश्वासन दिले. त्यानंतर त्याने सीबीआय कोर्टाच्या न्यायाधिशांसमोर त्यांची केस सुरु असल्याचे भासवून त्यांना डिजीटल अरेस्ट केल्याचे सांगितले. यावेळी व्हिडीओ कॉलवरुन तिने कोर्टाच्या न्यायाधिशांसमोरच या बँक खात्याशी माझा काहीही संबंध नाही. आपण तपास अधिकारी सहकार्य करण्यास तयार असल्याचे सांगितले. यावेळी कोर्टाने त्यांच्या बँक खात्याची माहिती काढून खात्यातील रक्कम सीबीआय कोर्टाच्या एका बँक खात्यात जमा करण्यास सांगितले.

चौकशी संपल्यानंतर तिला तिची रक्कम परत मिळेल असे आश्वासन दिले. त्यानंतर तिने तिच्या एफडी, सोने, म्युचल फंडची माहिती दिली. तिच्या बँकेत तीस तोळे सोने होते, या अधिकार्‍याने तिला सोन्यावर कर्ज घेण्यास सांगितले. याकामी तिला राजीवची सहकारी नेहा शर्मा या महिलेने मदत केली होती. त्यामुळे ती बँकेत गेली आणि तिने सोन्यावर कर्ज काढले. याबाबत कोणाशी चर्चा करु नका, नाहीतर तिच्यासह तिच्या पतीला आणि मुलाला अटक होईल अशी भीती दाखविली होती. 5 जूनला ती ताडदेव येथील बँकेत गेली आणि तिने तिच्या सोन्यावर तीस लाखांचे कर्ज घेतले होते. ही रक्कम त्याने सांगितलेल्या बँक खात्यात ट्रान्स्फर केली होती.

याच दरम्यान ती तिच्या कुटुंबियांसोबत बडोद्याला जात होती. यावेळी वर्तमानपत्रात डिजीटल अरेस्टबाबत होणार्‍या फसवणुकीची माहिती तिच्या वाचण्यात आली. त्यानंतर तिला तिची अज्ञात सायबर ठगाकडून फसवणुक झाल्याचे लक्षात आले. त्यानंतर तिने तिच्या पतीसह मुलाला घडलेला प्रकार सांगितला. त्यांच्या सांगण्यावरुन तिने सायबर हेल्पलाईन क्रमांक 1930 तसेच मध्य प्रादेशिक सायबर सेल पोलिसांत लेखी अर्जाद्वारे तक्रार केली होती. या तक्रारीच शहानिशा केल्यानंतर राजीव सिन्हा आणि नेहा शर्मा नावाच्या दोन सायबर ठगाविरुद्ध पोलिसांनी फसवणुकीसह आयटी कलमांतर्गत गुन्हा दाखल केला. या गुन्ह्यांचा सायबर सेल पोलिसांकडून तपास सुरु असल्याचे पोलिसांनी सांगितले.