ग्राहकांच्या डिजीटल गोल्डची परस्पर विक्री करुन फसवणुक

मुंबई क्राईम टाईम्स डॉट कॉम
25 जून 2025
मुंबई, – आदित्य बिर्ला कॅपिटल डिजीटल लिमिटेडच्या ग्राहकांच्या डिजीटल गोल्डची अज्ञात सायबर ठगाने विक्री करुन फसवणुक केल्याचा धक्कादायक प्रकार प्रभादेवी परिसरात उघडकीस आले आहे. आतापर्यंत 435 ग्राहकांच्या 1 कोटी 95 लाखांच्या गोल्डची विक्री करुन त्याची रक्कम विविध बँक खात्यात ट्रान्स्फर झाल्याचे तपासात उघडकीस आले आहे. याप्रकरणी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा दाखल करण्यात आला आहे. या गुन्ह्यांचा मध्य प्रादेशिक सायबर सेल विभागाकडून तपास सुरु असल्याचे पोलिसांनी सांगितले.

रविंद्र राजमल चौधरी हे जोगेश्वरी परिसरात राहत असून ते सध्या आदित्य बिर्ला कॅपिटल डिजीटल लिमिटेड कंपनीत फ्रॉड रिस्क मॅनेजमेंट हेड म्हणून काम करतात. त्यांच्या कंपनीचे मुख्य प्रभादेवी येथील वन वर्ल्ड सेंटर टॉवरमध्ये आहे. त्यांची कंपनीत सरकारमान्य डिजीटल गोल्ड खरेदी-विक्रीचे काम करते. कंपनीचे सर्व व्यवहार रॉजर पेद्वारे चालत असून या व्यवसायासाठी एबीसीडी नावाचे एक अ‍ॅप आहे. या अ‍ॅपद्वारे मल्टिप्लस फायनान्स प्रोडेक्टची खरेदी-विक्री करता येते. त्यासाठी कंपनीने त्यांच्या ग्राहकांना डिजीटल गोल्ड, सिल्व्हर, युपीआय, म्युच्युअल फंड, इन्सुरन्स अशा प्रकारच्या सेवा उपलब्ध करुन दिल्या आहेत. ग्राहकांना अ‍ॅपवर गोल्ड खरेदीसाठी रजिस्ट्रेशन करावे लागते. त्यानंतरच त्यांना गोल्ड खरेदी करता येते. ग्राहकांच्या ओटीपीशिवाय हा संपूर्ण होत नाही. ओटीपी दिल्यानंतर कंपनीच्या बँक खात्यातून रॉजर पेमार्फत रक्कम पाठविली जाते.

काही दिवसांपूर्वी कंपनीच्या टेक्निकल टिमला त्यांच्या कंपनीच्या अ‍ॅप व सर्व्हेरमध्ये अज्ञात व्यक्तीने अवैधरीत्या प्रवेश करुन ग्राहकांच्या बँक खात्यातील जमा डिजिगोल्डची परस्पर करुन त्याची रक्कम वेगवेगळ्या बँक खात्यात ट्रान्स्फर केल्याचे दिसून आले. 9 जूनला कंपनीला अनेक ग्राहकांनी कॉल करुन त्यांच्या परवानगीशिवाय त्यांच्या खरेदी केलेल्या डिजीटल गोल्डची परस्पर विक्री करण्यात आली असून ती रक्कम त्यांच्या बँक खात्यात जमा न होता दुसर्‍या बँक खात्यात ट्रान्स्फर झाल्याची तक्रार केली होती. हा प्रकार उघडकीस येताच कंपनीने गोल्ड विक्री सर्व्हिस बंद केली होती. तसेच टेक्निकल टिम तपासाचे आदेश दिले होते.

चौकशीदरम्यान 435 ग्राहकांचे डिजीटल गोल्ड ऑनलाईन परस्पर विक्री करुन अज्ञात सायबर ठगाने त्यांची 1 कोटी 95 लाख 10 हजार 429 रुपयांची फसवणुक केली होती. ही रक्कम वेगवेगळ्या बँक खात्यात जमा झाल्याचे उघडकीस आले. हा रिपोर्ट नंतर कंपनीच्या वरिष्ठांना सादर करण्यात आला होता. या घटनेची वरिष्ठांनी गंभीर दखल घेत रविंद्र चौधरी यांना पोलिसांत तक्रार करण्याचे आदेश दिले होते. त्यांनतर कंपनीच्या वतीने रविंद्र चौधरी यांनी मध्य प्रादेशिक विभागाच्या सायबर सेल पोलिसांत तक्रार केली होती.

या तक्रारीची शहानिशा केल्यानंतर अज्ञात सायबर ठगाविरुद्ध पोलिसांनी फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा पोलिसांनी तपास सुरु केला असून ज्या बँक खात्यात संबंधित रक्कम ट्रान्स्फर झाली आहे, त्या सर्व बँक खात्याची माहिती मिळविण्याचे काम सुरु आहे. ते बँक खाते कोणाचे आहे. ही रक्कम कधी, कुठल्या बँक खात्यात आणि किती रुपये ट्रान्स्फर झाली याची माहिती काढून संबंधित बँक खातेदारांना लवकरच चौकशीसाठी हजर राहण्याचे समन्स बजाविले जाणार आहे.