शेअरमध्ये गुंतवणुकीच्या नावाने दोन कंपन्यांकडून फसवणुक
बँक अधिकार्‍याला गंडा घालणार्‍या दोघांविरुद्ध गुन्हा दाखल
मुंबई क्राईम टाइम्स डॉट कॉम
5 ऑक्टोंबर 2025
मुंबई, – चांगला परतावा देतो असे सांगून शेअरमध्ये गुंतवणुकीच्या नावाने एका नामांकित बँकेच्या अधिकार्‍याला अज्ञात सायबर ठगाने सुमारे 23 लाखांना गंडा घातल्याचा प्रकार माटुंगा परिसरात उघडकीस आला आहे. याप्रकरणी एका महिलेसह दोघांविरुद्ध मध्य प्रादेशिक विभागाच्या सायबर सेल पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे. ज्या बँक खात्यात शेअरच्या नावाने पैसे ट्रान्स्फर झाले आहेत, त्या सर्व बँक खात्याची माहिती काढण्याचे काम सुरु असल्याचे पोलिसांनी सांगितले.
संदीप गोपाळ राव हे माटुंगा येथे राहत असून एका खाजगी बँकेत कामाला आहेत. 20 जुलैला ते घरी होते, यावेळी त्यांनी शेअर मार्केटच्या एका जाहिरातीवर क्लिक केले होते. त्यानंतर त्यांना मंगलम गणेश नावाच्या एका व्यक्तीने कॉल केला होता. त्याने तो आनंद राठी सिक्युरिटी कंपनीतून बोलत असल्याचे त्यांना शेअरमध्ये गुंतवणुक करण्याचा सल्ला दिला होता. त्यांच्या कंपनीमार्फत शेअरमध्ये गुंतवणुक केल्यास त्यांना चांगला फायदा होईल असे सांगितले. त्यानंतर त्याने त्यांना एका व्हॉटअप ग्रुपमध्ये अ‍ॅड केले होते.
या ग्रुपमध्ये शेअरसंदर्भातील माहिती देऊन कुठल्या शेअरची खरेदी आणि विक्री करायची, जेणेकरुन त्यांना किती रुपये फायदा होईल याची माहिती सांगितली जात होती. त्यामुळे त्यांनी कंपनीच्या माध्यमातून विविध शेअरमध्ये गुंतवणुक केली होती. सुरुवातीला त्यांना परताव्यासह गुंतवणुक रक्कम मिळत होती, त्यामुळे त्यांना कंपनीवर विश्वास बसला होता.
याच दरम्यान त्यांना दुसर्‍या एका शेअरसंबंधित कंपनीची माहिती समजली होती. या कंपनीच्या अंकिता घोष हिने त्यांना चांगला परताव्याचे आमिष दाखविताना त्यांच्या कंपनीच्या शेअरमध्ये गुंंतवणुकीचा सल्ला दिला होता. त्यामुळे त्यांनी तिच्या कंपनीकडून काही शेअरमध्ये गुंतवणुक केली होती. दोन्ही कंपन्यांच्या माध्ममातून त्यांनी जुलै महिन्यांत 23 लाख 17 हजाराची गुंतवणुक केली होती. या गुंतवणुकीवर त्यांना चांगला फायदा झाला होता. मात्र त्यांना त्यांची रक्कम त्यांच्या बँक खात्यात ट्रान्स्फर करता येत नव्हती.
याबाबत मंगलम गणेश आणि अंकिता घोषकडे विचारणा करुनही त्यांच्याकडून त्यांना प्रतिसाद मिळत नव्हता. नंतर त्यांनी त्यांचे मोबाईल क्रमांक ब्लॉक करुन त्यांना कंपनीच्या व्हॉटअप ग्रुपमधून बाहेर काढले होते. चांगल्या परताव्याचे गाजर दाखवून या दोघांनी शेअरमध्ये गुंतवणुक करण्यास प्रवृत्त करुन त्यांची फसवणुक केली होती.
त्यामुळे त्यांनी सायबर सेल हेल्पलाईनसह मध्य प्रादेशिक विभागाच्या सायबर सेल पोलिसांत तक्रार केली होती. या तक्रारीची शहानिशा केल्यानंतर मंगलम गणेश आणि अंकिता घोष या दोन्ही सायबर ठगाविरुद्ध पोलिसांनी फसवणुकीसह आयटीच्या विविध कलमांतर्गत गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.
