बसच्या चाकाखाली आल्याने अठरा वर्षांच्या तरुणाचा मृत्यू

मुंबई क्राईम टाइम्स डॉट कॉम
२२ जानेवारी २०२६
मुंबई,  – बसच्या चाकाखाली आल्याने एका अठरा वर्षांच्या तरुणाचा मृत्यू झाला. अदनान इजाज शेख असे या मृत तरुणाचे नाव असून त्याच्या मृत्यूप्रकरणी बेस्ट बसचालक अजीत बाळू खोत याच्याविरुद्ध ना. म जोशी मार्ग पोलिसांनी हलगर्जीपणाचा गुन्हा दाखल केला आहे. अदनानच्या अपघाती निधनाने स्थानिक रहिवाशांमध्ये प्रचंड शोककळा पसरली आहे.

हा अपघात बुधवारी सायंकाळी सव्वासात वाजता वरळीतील डॉ. ई मोजेस रोडच्या रखांगी चौक, खिश्चिन सिमेंटरी स्मशानभूमीजवळ झाला. लक्ष्मी येल्लप्पा गोल्हार ऊर्फ आदिबा एजाज शेख ही महिला घरकाम करत असून सध्या वरळीतील गांधीनगर, दैनिक शिवनेरी मार्ग, शिवगणेश इमारतीमध्ये राहते. 2006 साली तिचे इजाज मोहम्मद पुतन शेख याच्याशी प्रेमविवाह झाला होता. लग्नानंतर तिला हिंदू रितीरिवाजाप्रमाणे राहायचे होते, त्यामुळे तिने लग्नानंतर कोणत्याही कागदपत्रांवर तिचे नाव बदलले नाही.

मृत अदनान हा तिचा अठरा वर्षांचा मुलगा असून तो गिरगाव येथील भवन्स कॉलेजमध्ये कॉमर्सच्या पहिल्या वर्गात शिकत होता. घरातील आर्थिक परिस्थिती बेताची असल्याने अदनान हा केतन पापन यांच्या फ्लेक्स प्रिटींग दुकानात पार्टटाईम काम करुन घरात आर्थिक मदत करत होता. बुधवारी दुपारी दोन वाजता तो नेहमीप्रमाणे त्याच्या कामावर निघून गेला होता. सायंकाळी सव्वासात वाजता तो खिश्चिन सिमेंटरी स्माशनभूमीजवळून त्याच्या बाईकवरुन जात होता.

यावेळी तेथून जाणार्‍या एका बेस्ट बसने त्याच्या बाईकला जोरात धडक दिली होती. यावेळी बाईक स्लीप होऊन तो खाली पडला. याच दरम्यान बसच्या चाकाखाली आल्याने अदनान हा गंभीररीत्या जखमी झाला होता. त्यामुळे त्याला स्थानिक रहिवाशांनी तातडीने नायर हॉस्पिटलमध्ये दाखल केले होते. तिथे त्याला डॉक्टरांनी मृत घोषित केले होते. अपघाताची माहिती मिळताच एन. एम जोशी मार्ग पोलिसांनी घटनास्थळी धाव घेतली होती.

तपासात बस अपघताानंतर बसचालक अजीत खोत यानेच अदनानला जखमी अवस्थेत नायर हॉस्पिटलमध्ये दाखल केले होते. मात्र बसच्या चाकाखाली आल्याने त्याचा जागीच मृत्यू झाला होता. याप्रकरणी लक्ष्मी गोल्हार हिच्या तक्रारीवरुन पोलिसांनी बेस्टचालक अजीत खोत याच्याविरुद्ध हलगर्जीपणाने बस चालवून एका तरुणाच्या मृत्यूस कारणीभूत ठरल्याप्रकरणी गुन्हा दाखल केला आहे.