धारावी येथे पूर्ववैमस्नातून तरुणावर प्राणघातक हल्ला

मुंबई क्राईम टाईम्स डॉट कॉम
८ फेब्रुवारी २०२५
मुंबई, – पूर्ववैमस्नातून अजीज शेख ऊर्फ पापा या तरुणावर त्याच्याच परिचित तरुणाने सुर्‍याने प्राणघातक हल्ला केल्याची घटना धारावी परिसरात घडली. हल्ल्यात जखमी झालेल्या अजीजवर सायन हॉस्पिटलमध्ये उपचार सुरु असून त्याची प्रकृती आता स्थिर आहे. याप्रकरणी हत्येचा प्रयत्नासह अन्य कलमांतर्गत गुन्हा दाखल करुन धारावी पोलिसांनी पळून गेलेल्या मोहम्मद परवेज शेख या २४ आरोपीस अटक केली. अटकेनंतर त्याला वांद्रे येथील लोकल कोर्टाने पोलीस कोठडी सुनावली आहे.

ही घटना शुक्रवारी रात्री एक वाजता धारावीतील संगम गल्ली, मिलनननगर परिसरात घडली. २४ वर्षांचा इम्रान मोहम्मद अदीस अन्सारी हा धारावी येथे राहत असून एका मेडीकल शॉपमध्ये कामाला आहे. शुक्रवारी रात्री तो त्याचा मित्र अजीत शेख ऊर्फ पापा आणि तंगराज पिल्लई हे मिलन नगर येथील एका गार्मेट दुकानात होते. यावेळी तिथे परवेज शेख आला होता. त्याने अजीजसोबतचा जुना वाद काढून त्यांच्याशी वाद घालण्याचा प्रयत्न केला होता. काही वेळानंतर परवेज त्याच्याकडील सुर्‍याने त्याच्या पोटासह मानेवर प्राणघातक हल्ला केला होता. त्यात अजीज हा गंभीररीत्या जखमी झाला होता. यावेळी इम्रानने त्याला पकडण्याचा प्रयत्न केला असता त्याने त्याच्या उजव्या हातावर सुर्‍याने वार केले होते. या हल्ल्यानंतर तो पळून गेला होता.

जखमी झालेल्या अजीजसह इम्रानला नंतर सायन हॉस्पिटलमध्ये दाखल करण्यात आले. अजीजची दुखापत गंभीर असल्याने त्याला उपचारासाठी दाखल करण्यात आले तर इम्रानला प्राथमिक उपचारानंतर सोडून देण्यात आले. ही माहिती मिळताच धारावी पोलिसांनी घटनास्थळी धाव घेतली होती. याप्रकरणी इम्रान अन्सारीच्या तक्रारीवरुन पोलिसांनी परवेज शेखविरुद्ध हत्येचा प्रयत्नासह अन्य कलमांतर्गत गुन्हा दाखल केला होता. गुन्हा दाखल होताच पळून गेलेल्या परवेजला पोलिसांनी अटक केली. अटकेनंतर त्याला वांद्रे येथील लोकल कोर्टात हजर करण्यात आले होते. यावेळी कोर्टाने त्याला पोलीस कोठडी सुनावली आहे.