दिल्लीतील 74 वर्षांच्या वयोवृद्ध व्यापार्‍यावर हनीट्रप

मुंबई क्राईम टाईम्स डॉट कॉम
8 मार्च 2025
मुंबई, – दिल्लीतील रहिवाशी असलेल्या एका 74 वर्षांच्या वयोवृद्ध व्यापार्‍यावर स्वतच्या प्रेमाच्या जाळ्यात ओढून भावविक ब्लॅकमेल करुन खंडणीसाठी धमकी दिल्याप्रकरणी एका महिलेसह दोघांविरुद्ध मालवणी पोलिसांनी गुन्हा दाखल केला आहे. मिरा ऊर्फ साहिस्ता आणि एझाझ लकडावाला अशी या दोघांची नावे आहेत. मिराने आतापर्यंत तक्रारदार व्यापार्‍याकडून साडेअठरा लाखांची खंडणी वसुल केल्याचे तपासात उघडकीस आले आहे. त्यामुळे तिची पोलिसांकडून लवकरच चौकशी करुन जबानी नोंदविण्यात येणार आहे. या चौकशीनंतर तिच्यावर अटकेची कारवाई होणार आहे.

74 वर्षांचे वयोवृद्ध तक्रारदार व्यापारी असून ते त्यांच्या कुटुंबियांसोबत नवी दिल्लीत राहतात. तीन वर्षांपूर्वी त्यांची साहिस्ता नावाच्या महिलेशी ओळख झाली होती. या ओळखीनंतर त्यांच्यात चांगली मैत्री झाली होती. ते दोघेही एकमेकांच्या संपर्कात होते. अनेकदा ते मुंबईत आल्यानंतर साहिस्ताला भेटत होते. तिने त्यांना तिच्या प्रेमाच्या जाळ्यात ओढले होते. तिचे त्यांच्यावर खूप प्रेम असल्याचे ती त्यांना नेहमीच सांगत होती. याच दरम्यान त्यांची तिच्यासोबत मालाडच्या मालवणीतील मार्वे रोडवर हॉटेलमध्ये भेट झाली होती. या भेटीदरम्यान तिने त्यांच्याशी जवळीक निर्माण करुन त्यांना तिच्यासोत शारीरिक संबंध ठेवण्यास प्रवृत्त केले होते. त्यानंतर त्यांच्यात शारीरिक संबंध आले होते. सर्व काही सुरळीत असताना काही दिवसांनी तिने त्यांना भावनिक ब्लॅकमेल करण्यास सुरुवात केली होती. त्यांच्याकडे सतत पैशांची मागणी करत होती.

1 जुलै ते 5 सप्टेंबर 2023 या कालावधीत तिने त्यांच्याकडून साडेअठरा लाख रुपये घेतले होते. ही रक्कम दिल्यानंतरही ती त्यांना ब्लॅकमेल करत होती. त्यांना इजाज लकडावाला याच्या नावाने धमकी देत होती. साहिस्ताने त्यांच्याशी जवळीक साधून त्यांना अलगद हनीट्रपच्या माध्यमातून स्वतच्या जाळ्यात ओढून त्यांना खंडणीसाठी धमकी देत होती. त्यासाठी ती सतत इजाज लकडावालाच्या नावाचा वापर करत होती. तिच्याकडून खंडणीसाठी येणार्‍या धमकीला कंटाळून त्यांनी घडलेला मालवणी पोलिसांना सांगितला होता. त्यांच्या तक्रार अर्जाची शहानिशा केल्यानंतर साहिस्ता आणि इजाज लकडावाला या दोघांविरुद्ध कट रचून खंडणीसाठी धमकी दिल्याप्रकरणी गुन्हा दाखल केला आहे.

याच गुन्ह्यांत साहिस्ताची लवकरच पोलिसांकडून चौकशी होणार आहे. या चौकशीतून या गुन्ह्यांत इजाज लकडावाला याचा सहभाग आहे का याचा खुलासा होणार आहे. साहिस्ताने हनीट्रपद्वारे इतर काही व्यक्तींना स्वतच्या प्रेमाच्या जाळ्यात अडकवून त्यांना खंडणीसाठी धमकी दिली आहे का याचाही पोलीस तपास करत आहेत.