बसच्या चाकाखाली आल्याने तीन वर्षांच्या मुलीचा मृत्यू

मुंबई क्राईम टाईम्स डॉट कॉम
7 एप्रिल 2025
मुंबई, – रस्त्यावरुन जाताना बसची धडक लागून बसच्या चाकाखाली आल्याने एका तीन वर्षांच्या मुलीचा मृत्यू झाल्याची घटना बोरिवली परिसरात घडली. मेहक खातून शेख असे मृत मुलीचे नाव असून तिच्या मृत्यूप्रकरणी बसचालक प्रकाश दिगंबर कांबळे याच्याविरुद्ध कस्तुरबा मार्ग पोलिसांनी गुन्हा दाखल केला आहे. याच गुन्ह्यांत नंतर त्याला पोलिसांनी अटक केली.

हा अपघात सोमवारी दुपारी पाऊणच्या सुमारास बोरिवलीतील राजेंद्रनगर परिसरात झाला. प्रकाश कांबळे हा बेस्टचालक असून तो दुपारी कंडक्टरशिवाय असलेल्या प्रवासी बेस्ट बस घेऊन बोरिवली येथून मागाठाणे डेपोच्या दिशेने जात होती. दुपारी पाऊणच्या सुमारास ही बस राजेंद्रनगर परिसरातून जात होती. यावेळी रस्त्याच्या कडेला असलेली मेहक ही अचानक रस्त्यावर आली. बसच्या टाायरला स्पर्श होऊन ती खाली पडली. यावेळी बसच्या चाकाखाली आल्याने ती गंभीररीत्या जखमी झाली होती. जखमी झालेल्या मेहकला स्थानिक लोकांनी तातडीने कांदिवलीतील शताब्दी हॉस्पिटलमध्ये दाखल केले होते.

दुपारी सव्वाच्या सुमारास तिला डॉक्टर धर्मेशा संखे यांनी तपासून मृत घोषित केले. अपघाताची माहिती मिळताच कस्तुरबा मार्ग पोलिसांनी घटनास्थळी धाव घेतली होती. याप्रकरणी बसचालक प्रकाश कांबळे याच्याविरुद्ध पोलिसांनी हलगर्जीपणाने बस चालवून एका तीन वर्षांच्या मुलीच्या मृत्यूस कारणीभूत ठरल्याप्रकरणी गुन्हा दाखल केला होता. याच गुन्ह्यांत नंतर त्याला पोलिसांनी अटक केली. मेहकच्या अपघाताची निधनाने स्थानिक रहिवाशांमध्ये प्रचंड शोककळा पसरली होती.