टेम्पोची बाईकला धडक लागून 20 वर्षांच्या तरुणीचा मृत्यू

मुंबई क्राईम टाईम्स डॉट कॉम
3 मे 2025
मुंबई, – टेम्पोची बाईकला धडक लागून झालेल्या अपघातात तेजस्विनी रविंद्र बारगुडे या 20 वर्षांच्या तरुणीचा मृत्यू झाला. याप्रकरणी बांगुरनगर पोलिसांनी अपघाताची नोंद करुन टेम्पोचालक जयप्रकाश सोमईराम गौतम याला अटक केली. जयप्रकाश हा कांदिवलीतील चारकोप परिसरात राहत असून अटकेनंतर त्याची जामिनावर सुटका करण्यात आल्याचे पोलिसांनी सांगितले.

हा अपघात मंगळवारी 29 एप्रिलला रात्री आठ वाजता मालाड येथील माईंडस्पेस, बँक रोडवरील सोनी टिव्ही जंक्शन परिसरात झाला. टायटस सुंदरराज चेट्टी हा 20 वर्षांचा तरुण मालाड येथे राहत असून कांदिवलीतील ठाकूर कॉलेजमध्ये शिक्षण घेतो. मृत तेजस्विनी ही त्याची मैत्रिण असून ती मालाड पूर्वेकडील शांताराम तलाव, जानूभव कंपाऊंड परिसरात राहते. मंगळवारी रात्री आठ वाजता तो तेजस्विनी, सोहम जगताप, रुचीरा बारगुडे यांच्यासोबत बाईकवरुन बॅडमिंटन खेळण्यासाठी मालाड येथील सबवेवरुन माईंडस्पेस, बॅक रोडजवळ जात होते. यावेळी टायटस हा तेजस्विनीसोबत बाईकवरुन तर सोहम रुचीरासोबत त्याच्या गाडीवरुन जात होते. टायटसची बाईक् इजमिमा कॉर्नरपासून बँकरोडच्या दिशेने जात होती. याच दरम्यान एका टेम्पोने कुठलीही इंडीकेटर न देता यु टर्न घेण्याचा प्रयत्न केला होता. त्यात टेम्पोची बाईकला धडक लागून ते दोघेही बाईकवरुन खाली पडले होते.

अपघातात तेजस्विनी झाडाला जोरात आदळून रस्त्याच्या दुसर्‍या बाजूला पडली होती. त्यात ती गंभीररीत्या जखमी झाली होती. अपघाताची माहिती मिळताच बांगुरनगर पोलिसांनी घटनास्थळी धाव घेतली होती. जखमी झालेल्या तेजस्विनीला तातडीने पोलिसांनी कांदिवलीतील शताब्दी हॉस्पिटलमध्ये दाखल केले होते. तिथे तिला डॉक्टरांनी मृत घोषित केले. याप्रकरणी टायटस चेट्टी याच्या तक्रारीवरुन पोलिसांनी टेम्पोचालक जयप्रकाश गौतम याच्याविरुद्ध हलगर्जीपणाने टेम्पो चालवून एका तरुणीच्या मृत्यूस कारणीभूत ठरल्याप्रकरणी गुन्हा दाखल केला होता. याच गुन्ह्यांत नंतर त्याला पोलिसांनी अटक केली. हा गुन्हा जामिनपात्र असल्याने त्याची नंतर जामिनावर सुटका करण्यात आली.

होंडासिटी कारच्या धडकेने महिला गंभीर जखमी
दुसर्‍या अपघाताच्या घटनेत पूजा दिपक वर्मा ही 51 वर्षांची महिला जखमी झाल्याची घटना शनिवारी सकाळी घडली. पूजा ही तिचे पती संदीप वर्मासोबत मालाड परिसरात राहते. सकाळी सहा वाजता ती तिच्या पतीसोबत मार्निंग वॉकसाठी जात होती. मालाड येथील इन्फिनिटीमॉलजवळील बँक रोडजवळ जाताना एका होंडासिटी कारने तिला जोरात धडक दिली. त्यात ती गंभीररीत्या जखमी झाली होती. तिच्या पोटाला, पायाला आणि तोंडाला गंभीर दुखापत झाली होती. तिला जवळच्या खाजगी हॉस्पिटलमध्ये उपचारासाठी दाखल करण्यात आले आहे. अपघातानंतर कारचा चालक तिला कुठलीही वैद्यकीय मदत किंवा पोलिसांना अपघाताची माहिती न देता पळून गेला आहे. तिच्या पतीच्या तक्रारीवरुन पोलिसांनी कारचालकाविरुद्ध गुन्हा दाखल केला असून सीसीटिव्ही फुटेजच्या मदतीने पळून गेलेल्या कारचालकाचा पोलीस शोध घेत आहेत.