दोन वयोवृद्ध बहिणींच्या फसवणुकप्रकरणी आरोपीस अटक

अरुण सावरटकर
18 मे 2025
मुंबई, – शेअरमध्ये गुंंतवणुकीच्या बहाण्याने दोन वयोवृद्ध बहिणींची सुमारे 67 लाख रुपयांची फसवणुक केल्याप्रकरणी मोहीत आकाश भोजराज नावाच्या एका आरोपीस दक्षिण प्रादेशिक विभागाच्या सायबर सेल पोलिसांनी अटक केली. मोहीत हा सालिद मोहम्मद शेख या सायबर ठगाचा संपर्कात होता. त्याच्यासाठी त्याने आतापर्यंत एकोणीस बँक खाती पुरविली होती. फसवणुकीची रक्कम याच बँक खात्यात जमा होत असल्याचे तपासात उघडकीस आले आहे. अटकेनंतर मोहीतला लोकल कोर्टाने पोलीस कोठडी सुनावली असून याच गुन्ह्यांत त्याची पोलिसांकडून चौकशी सुरु आहे. या वृत्ताला वरिष्ठ पोलीस निरीक्षक नंदकुमार गोपाळे यांनी दुजोरा दिला आहे.

67 वर्षांच्या वयोवृद्ध तक्रारदार प्रतिभा प्रदीप देसाई या गिरगाव येथे त्यांच्या आई-बहिणीसोबत राहतात. तिच्यासह तिच्या बहिणीने एका फायनान्स कंपनीत गुंतवणुक केली होती. या कंपनीच्या ग्रुपमध्ये तिच्या बहिणीला जानेवारी 2025 मध्ये अ‍ॅड करण्यात आले होते. या ग्रुपमध्ये श्रृती बाहेती ही महिला अ‍ॅडमिन होती. गु्रपमध्ये शेअरसंदर्भातील दैनदिन माहिती देताना कुठल्या शेअरवर गुंतवणुक केल्यास चांगला फायदा होईल याबाबतची माहिती दिली जात होती. ग्रुपच्या सभासदाचा विश्वास बसावा म्हणून श्रृती ही त्यांनी सांगितलेल्या शेअरमध्ये लोकांना किती रुपयांचा फायदा झाला आहे याचा एक चॅट देत होती. त्यामुळे तिच्यावर अनेकांचा विश्वास बसला होता. 21 जानेवारीला तिने तिच्या बहिणीला पर्सनल चॅट करुन तिला शेअरमध्ये गुंतवणुक करण्यास सांगितले होते.

तिने तिचे पैसे ब्लॉक शेअर डिलमध्ये गुंतवणुक करुन तिला चांगला परतावा देण्याचे आश्वासन दिले होते. तिच्यावर विश्वास ठेवून तिने शेअरमध्ये गुंतवणुकीचा निर्णय घेताना कंपनीत स्वतचे एक खाते उघडले होते. त्यानंतर तिने याच कंपनीमार्फत शेअरमध्ये मोठ्या प्रमाणात गुंतवणुक केली होती. तिच्या गुंतवणुकीवर तिला चांगला फायदा झाला होता. त्यामुळे प्रतिभा देसाई हिनेही ग्रुपमध्ये सामिल करुन कंपनीमार्फत शेअरमध्ये गुंतवणुक केली होती. काही दिवसांत प्रतिभासह तिच्या बहिणीने शेअरमध्ये 67 लाख 15 हजार 174 रुपयांची गुंतवणुक केली होती. या गुंतवणुकीवर त्यांना मूळ रक्कमेसह प्रॉफिट अशी 1 कोटी 88 लाख रुपये झाल्याचे दिसून आले होते. त्यांनी त्यांनी त्यापैकी 50 लाख रुपये त्यांच्या बँक खात्यात ट्रान्स्फर करण्याचा प्रयत्न केला, मात्र त्यांची रक्कम ट्रान्स्फर झाली नाही.

याबाबत त्यांनी श्रृतीकडे विचारणा केली होती. यावेळी तिने त्यांना टॅक्सची रक्कम भरल्यानंतरच त्यांच्या बँक खात्यात ही रक्कम ट्रान्स्फर होईल. त्याशिवाय त्यांना ही रक्कम काढता येणार नाही असे सांगितले होते. यावेळी या दोघींनाही श्रृतीकडून आपली फसवणुक झाल्याचे निदर्शनास आले. त्यामुळे प्रतिभाने सायबर हेल्पलाईन क्रमांकासह दक्षिण प्रादेशिक सायबर सेल विभागात तक्रार केली होती. या तक्रारीनंतर पोलिसांनी संबंधित आरोपीविरुद्ध कट रचून फसवणुक करणे आणि आयटी कलमांतर्गत गुन्हा दाखल केला होता. गुन्हा दाखल होताच वरिष्ठ पोलीस निरीक्षक नंदकुमार गोपाळे यांच्या पथकाने तपास सुरु केला होता. तांत्रिक माहितीवरुन पोलिसांनी मोहित भोजराज याला चौकशीसाठी ताब्यात घेतले.

चौकशीत मोहीत हा दहिसरच्या भीमनगरचा रहिवाशी आहे. फसवणुकीची सोळा लाखांची रक्कम कल्याणी इंटरप्रायजेस या कंपनीच्या बँक खात्यात जमा झाली होती. ही कंपनी हेमंत माळी यांच्या मालकीची असून त्यांचा शेती आणि भाजीपालाचा व्यवसाय आहे. त्यांच्या बँक खात्याचा वापर मोहीतने फसवणुकीसाठी केला होता. मोहीत हा सालिद मोहम्मद शेख या सायबर ठगाचा संपर्कात होता. त्याला त्याने आतापर्यंत एकोणीस बँक खात्याची माहिती पुरविली होती. याच बँक खात्यात ऑनलाईन फसवणुकीची रक्कम जमा होत होती. सालिद हा कर्नाटकच्या मंगलोरचा रहिवाशी असून त्याला या गुन्ह्यांत पाहिजे आरोपी दाखविण्यात आल्याचे वरिष्ठ पोलीस निरीक्षक नंदकुमार गोपाळे यांनी सांगितले. तपासात हा प्रकार उघडकीस येताच त्याला पोलिसांनी अटक केली. अटकेनंतर त्याला लोकल कोर्टाने पोलीस कोठडी सुनावली आहे. या गुन्ह्यांत इतर काही आरोपींचा सहभाग उघडकीस आला असून त्यांच्या अटकेसाठी पोलिसांनी विशेष मोहीम हाती घेतली आहे.