60 कोटीच्या फसवणुकीप्रकरणी राज कुंद्राची पाच तास चौकशी

मुंबई क्राईम टाइम्स डॉट कॉम
15 सप्टेंबर 2025
मुंबई, – व्यवसायात गुंतवणुक करण्यास प्रवृत्त करुन गुंतवणुकीवर चांगला परतावा देण्याचे आमिष दाखवून एका वयोवृद्धाची सुमारे 60 कोटीची फसवणुक केल्याचा आरोप असलेल्या सिनेअभिनेत्री शिल्पा शेट्टी हिचा व्यावसायिक पती राज कुंद्रा यांची आर्थिक गुन्हे शाखेच्या अधिकार्‍यांनी सुमारे पाच तास कसून चौकशी केली होती. या चौकशीत फसवणुकीच्या गुंतवणुकीसह इतर सर्व आर्थिक व्यवहाराची माहिती घेण्यात आली होती. ही चौकशी अर्धवट राहिल्याने राज कुंद्रा याला पुन्हा चौकशीसाठी हजर राहण्याचे समन्स बजाविण्यात आले आहे. दरम्यान याच गुन्ह्यांत शिल्पा शेट्टी ही सहआरोपी असल्याने तिचीही लवकरच पोलिसांकडून चौकशी होणार असल्याचे पोलिसांकडून सांगण्यात आले. या चौकशीनंतर त्यांच्यावरील पुढील कारवाईची दिशा ठरविली जाणार आहे.

दिपक रामदास कोठारी हे साठ वर्षांचे वयोवृद्ध तक्रारदार असून ते विलेपार्ले परिसरात राहतात. त्यांची लोटस कॅपिटल फायनान्स सव्हिसेस नावाची एक खाजगी कंपनी असून याच कंपनीत ते संचालक म्हणून काम करत होते. दहा वर्षापूर्वी त्यांची शिल्पा शेट्टी आणि राज कुंद्रा यांच्याशी ओळख झाली होती. त्यांना त्यांना बेस्ट डिल या गृहखरेदी आणि ऑनलाईन रिटेल प्लॅटफॉर्मचे संचालक असल्याचे सांगून त्यांच्या व्यवसायात गुंतवणुकीचा सल्ला दिला होता. या गुंतवणुकीवर त्यांना चांगला परतावा देण्याचे आश्वासन देण्यात आले होते. त्यांच्यावर विश्वास ठेवून दिपक कोठारी यांनी राज कुंद्रा आणि शिल्पा शेट्टीसोबत एक करार करुन त्यांच्याकडे 60 कोटीची फसवणुक केली होती.

मात्र कंपनीला प्रचंड नुकसान झाल्याचे सांगून या दोघांनी त्यांना कुठलाही परतावा तसेच गुंतवणुक केलेली साठ कोटी परत न करता फसवणुक केली होती. हा प्रकार लक्षात येताच त्यांनी जुहू पोलिसांत शिल्पा शेट्टी आणि राज कुंद्रा यांच्याविरुद्ध तक्रार केली होती. या तक्रारीची शहानिशा केल्यानंतर या दोघांविरुद्ध पोलिसांनी अपहारासह फसवणुकीचा गुन्हा दाखल केला होता. या गुन्ह्यांची व्याप्ती मोठी असल्याने या गुन्ह्यांचा तपास आता आर्थिक गुन्हे शाखेकडे वर्ग करण्यात आला होता.

शिल्पा शेट्टी आणि राज कुंद्रा हे नियमित विदेशात जात असल्याने ते पळून जाण्याची शक्यता असल्याने त्यांच्याविरुद्ध अलीकडेच आर्थिक गुन्हे शाखेने लुक आऊट नोटीस जारी केले होते. या नोटीसमुळे या दोघांनी विदेशात जाता येणार नव्हते. या नोटीसनंतर राज कुंद्रा याला चौकशीसाठी हजर राहण्याचे समन्स बजाविण्यात आले होते. मात्र तो चौकशीसाठी हजर राहिला नव्हता. अखेर सोमवारी तो आर्थिक गुन्हे शाखेत चौकशीसाठी हजर झाला होता. यावेळी त्याची पोलिसांनी सुमारे पाच तास चौकशी करुन जबानी नोंदवून घेतली आहे.

या चौकशीनंतर त्याला सोडून देण्यात आले. ही चौकशी पूर्ण न झाल्याने त्याला पुन्हा चौकशीसाठी समन्स बजाविण्यात आले आहे. लुक आऊट नोटीसनंतर तास झालेल्या चौकशीमुळे राज कुंद्रा याच्या अडचणीत चांगली वाढ झाली आहे. दरम्यान याच गुन्ह्यांत शिल्पा शेट्टी हिची पोलिसांकडून चौकशी करुन जबानी नोंदविण्यात येणार असल्याचे पोलिसांकडून सांगण्यात आले.