अभिनेता-दिग्दर्शक सिद्धांत कपूरला चौकशीचे समन्स जारी

मुंबई क्राईम टाईम्स डॉट कॉम
21 नोव्हेंबर 2025
मुंबई, – कोट्यवधी रुपयांच्या ड्रग्जप्रकरणी दुबईहून प्रत्यार्पण करण्यात आलेला मुख्य आरोपी सलमान सलीम शेख ऊर्फ शेरा याच्या जबानीतून देश-विदेशातील रेव्ह ड्रग्ज पार्टीचा पर्दाफाश करण्यात घाटकोपर युनिटच्या अ‍ॅण्टी नारकोटीक्स सेलच्या अधिकार्‍यांनी पर्दाफाश केला होता. या रेव्ह ड्रग्ज पार्टीत बॉलीवूडचे अनेक सेलिब्रिटीसह मॉडेल आणि राजकारणी सहभागी होत असल्याने आता संबंधित व्यक्ती मुंबई पोलिसांच्या रडार आहे. त्याच्याच एक भाग म्हणून बॉलीवूड अभिनेता, दिग्दर्शक आणि सिनेअभिनेत्री श्रद्धा कपूरचा भाऊ सिद्धांत कपूर याला पोलिसांनी चौकशीसाठी समन्स जारी केले आहे. पुढील आठवड्यात त्याची घाटकोपर युनिटकडून चौकशी करुन जबानी नोंदविण्यात येणार आहे.

कोट्यवधी रुपयांच्या ड्रग्जप्रकरणी घाटकोपर युनिटने सलमान शेख ऊर्फ शेरा याला दुबईतून प्रत्यार्पण केल्यानंतर अटक केली होती. पोलीस तपासात सलमाने अनेक धक्कादायक खुलासे केले होते. त्यात त्याने देश-विदेशात अनेक बॉलीवूड, फॅशन आणि राजकारण्यासाठी रेव्ह ड्रग्ज पार्ट्यांचे आयोजन केल्याची कबुली दिली. यावेळी त्याने काही बॉलीवूड कलाकारासह फॅशन क्षेत्रातील काही मॉडेल, राजकारण्यांची नावे सांगितली होती. रेव्ह पार्ट्यांमध्ये सामिल झालेल्या सेलिब्रिटींना त्याने ड्रग्ज पुरविल्याची कबुली दिली आहे.

या पार्टीत कोण-कोण सहभागी झाले होते, त्याची एक यादीच पोलिसांकडून बनविण्यात आली होती. त्यामुळे वरिष्ठांच्या आदेशावरुन घाटकोपर युनिटने संंबंधित सर्व व्यक्तींची चौकशी करण्याचा निर्णय घेतला होता. त्याचाच एक भाग म्हणून सिद्धांत कपूर यांची पोलिसांकडून चौकशी होणार आहे. या पार्टीमध्ये सिद्धांत कूपर सहभागी झाल्याचा आरोप सलमानने केला होता. त्यामुळे त्यांना पुढील आठवड्यात चौकशीसाठी हजर राहण्याचे समन्स बजाविण्यात आले आहे.

त्यानंतर इतर बॉलीवूड सेलेब्रिटी, फॅशन जगताशी संबंधित मॉडेल आणि राजकारण्यांची पोलिसांकडून चौकशी होणार आहे. त्यांनाही लवकरच चौकशीसाठी हजर राहण्याचे समन्स पाठविले जाणार आहे. या चौकशीचा अहवाल नंतर वरिष्ठांना सादर केला जाणार आहे. वरिष्ठांच्या आदेशानंतर संबंधितांवर योग्य ती कारवाई केली जाणार असल्याचे बोलले जाते. ड्रग्ज प्रकरणात मुंबई पोलीस अ‍ॅक्शन मोडवर आल्याने बॉलीवूडसह मॉडलिंग आणि राजकीय वर्तुळात एकच खळबळ उडाली आहे.