सोन्याच्या वर्कशॉपमध्ये झालेल्या 48 लाखांच्या रॉबरीचा पर्दाफाश

मुंबई क्राईम टाइम्स डॉट कॉम
28 ऑक्टोंबर 2025
मुंबई, – पार्सल देण्याचा बहाणा करुन शिवडीतील सोन्याचे दागिने बनविण्याच्या वर्कशॉमध्ये झालेल्या रॉबरीचा पर्दाफाश करण्यात अखेर रफि अहमद किडवाई मार्ग पोलिसांना यश आले आहे. याप्रकरणी वर्कशॉपच्या तक्रारदार सुरक्षारक्षकासह त्याच्या तीन सहकार्‍यांना पोलिसांनी अटक केली आहे. त्यात रोहितकुमार महेंद्रकुमार शर्मा, मनिष राठोड, भगवान पारस्कर ऊर्फ मामा आणि मंगल कश्यप यांचा समावेश आहे. अटकेनंतर या चारही आरोपींना लोकल कोर्टाने पोलीस कोठडी सुनावली आहे. या कटात दोन सहकारी फरार असून त्यांच्या अटकेसाठी दोन विशेष पथक मुंबईबाहेर पाठविण्यात आल्याचे पोलीस उपायुक्त रागसुधा आर यांनी सांगितले. आतापर्यंतच्या चौकशीत रोहितकुमारनेच त्याच्या पाच सहकार्‍यांच्या मदतीने रॉबरीचा कट रचल्याचे उघडकीस आले असून या गुन्ह्यांतील काही सोन्याचे दागिने पोलिसांनी हस्तगत केले आहेत.

रोहितकुमार हा मूळचा उत्तरप्रदेशच्या कानपूरचा रहिवाशी असून सध्या शिवडी परिसरात राहतो. गेल्या काही महिन्यापासून तो शिवडीतील बुसा इंडस्ट्रियल इस्टेटमध्ये असलेल्या सोन्याच्या दागिने बनविण्याच्या वर्कशॉपमध्ये सुरक्षारक्षक म्हणून काम करत होता. मंगळवारी 21 ऑक्टोंबरला त्याचे मालक प्रदीप दिनेश शर्मा व त्यांचे मित्र कारखान्यात दिवाळीनिमित्त पूजेसाठी आले होते. रात्री साडेआठ वाजता ते सर्वजण निघून गेले. त्यामुळे त्यांनी कारखान्याचा मेन दरवाजा बंद केला होता. काही वेळानंतर तो कारखान्यातील पोटमाळ्यावर झोपण्यासाठी गेला होता. रात्री सव्वादहा वाजता त्याला कारखान्याच्या मुख्य दरवाज्यावर कोणीतरी ठोठावत असल्याचे दिसून आले. त्यामुळे त्याने दरवाज्याच्या छोट्या खिडकीतून बाहेर डोकावून पाहिले.

यावेळी त्याला एक टी-शर्ट घातलेला तरुण दिसला. तुमचा पार्सल आला आहे असे सांगून त्याने दरवाजा उघडण्यास सांगितले. त्यामुळे त्याने दरवाजा उघडला. यावेळी काही कळण्यापूर्वी तिथे इतर दोनजण आले. या तिघांनी आत प्रवेश करुन त्याला घातक शस्त्रांचा धाक दाखवून जिवे मारण्याची धमकी दिली होती. त्याने त्यांचा प्रतिकार करण्याचा प्रयत्न केल्यानंतर त्यातील एकाने सुर्‍याने त्याच्यावर वार केले होते. त्यानंतर ते सर्वजण कारखान्यातील कार्यालयात पूजेसाठी मांडलेल्या टेबलाच्या ड्रॉव्हरमधील सोन्याचे दागिने घेऊन पलायन केले. त्यांनी त्यांचा पाठलाग करुन मदतीसाठी आरडाओरड केला होता.

हा प्रकार स्थानिक रहिवाशांना निदर्शनास येताच त्यांनी मुंबई पोलिसांच्या कंट्रोल रुमला ही माहिती दिली. या माहितीनंतर आरएके मार्ग पोलिसांनी घटनास्थळी धाव घेतली होती. चोरट्याच्या हल्ल्यात जखमी झालेल्या रोहितकुमार शर्माला नंतर पोलिसांनी तातडीने जवळच्या केईएम हॉस्पिटलमध्ये दाखल केले. तिथे त्याच्यावर प्राथमिक औषधोचार करुन त्याची पोलिसांनी जबानी नोंदवून घेतली होती. या जबानीनंतर घडलेला प्रकार उघडकीस आला. याप्रकरणी त्याचा मालक प्रदीप शर्मा यांची पोलिसांनी चौकशी केली होती. या चौकशीतून चोरट्यांनी त्यांच्या कारखान्यात प्रवेश करुन घातक शस्त्रांचा धाक दाखवून सुमारे 48 लाखांचे 400 ग्रॅम वजनाचे सोन्याचे दागिने चोरी केल्याचे सांगितले.

याप्रकरणी रोहितकुमारच्या तक्रारीवरुन पोलिसांनी तिन्ही आरोपीविरुद्ध रॉबरीचा गुन्हा दाखल करुन तपास सुरु केला होता. याच गुन्ह्यांत रोहितकुमारला पोलिसांनी चौकशीसाठी ताब्यात घेतले होते. त्याच्या चौकशीत तो सतत विसंगत माहिती देत होता. त्याचे मोबाईलचे सीडीआर काढल्यानंतर तो काही लोकांच्या संपर्कात असल्याचे उघडकीस आले होते. या सीडीआरसह सीसीटिव्ही फुटेज आणि तांत्रिक माहितीवरुन पोलिसांनी इतर तिघांना चौकशीसाठी ताब्यात घेतले होते. चौकशीत त्यांनीच ही रॉबरी केल्याचे सांगितले. या संपूर्ण कटाचा मुख्य सूत्रधार रोहितकुमार होता. त्यानेच रॉबरीचा कट रचून त्यात त्याच्या इतर पाच सहकार्‍यांना सामिल करुन घेतले होते.

रोहितकुमार हा नवी मुंबईत राहत असताना त्याच्यासोबत संबंधित पाचही आरोपी राहत होते. त्यानेच त्यांना वर्कशॉमध्ये लाखो रुपयांचे सोन्याचे दागिने असल्याचे आणि तिथे रॉबरी करण्यास सांगितले होते, मात्र त्यांच्या चौकशीतून या रॉबरीचा पोलिसांनी पर्दाफाश केला. याच गुन्ह्यांत नंतर रोहितकुमारसह त्याच्या तीन सहकार्‍यांना पोलिसांनी अटक केली. ते सर्वजण कोलकाता, उत्तरप्रदेश, नेपाळचे रहिवाशी आहे. या गुन्ह्यांत दोनजण पळून गेल्याने त्यांचा पोलिसांकडून शोध सुरु आहे. याच दोघांकडे सोन्याचे दागिने असले तरी त्यातील काही दागिने हस्तगत करण्यात पोलिसांना यश आले. अटकेनंतर चारही आरोपींना लोकल कोर्टात हजर करण्यात आले होते. यावेळी कोर्टाने त्यांना पोलीस कोठडी सुनावली आहे.