शेअर ट्रेडिंगमध्ये गुंतवणुकीच्या आमिषाने पाच कोटींची फसवणुक

मुंबई क्राईम टाइम्स डॉट कॉम
18 ऑगस्ट 2025
मुंबई, – शेअर ट्रेडिंगमध्ये गुंतवणुक केल्यास चांगला परताव्याचे आमिष दाखवून एका खाजगी कंपनीच्या वरिष्ठ अधिकार्‍याची अज्ञात सायबर ठगाने सुमारे पाच कोटीची फसवणुक झाल्याचा प्रकार प्रभादेवी परिसरात उघडकीस आला आहे. याप्रकरणी तक्रारदाराच्या जबानीनंतर मध्य प्रादेशिक सायबर विभागाने अज्ञात सायबर ठगाविरुद्ध फसवणुकीसह आयटीच्या विविध कलमांतर्गत गुन्हा दाखल केला आहे. या गुन्ह्यांचा सायबर सेलने तपास सुरु केला असून ज्या बँक खात्यात ही रक्कम ट्रान्स्फर झाली आहे, त्या बँक खात्याची माहिती काढून संबंधित दोषी व्यक्तींच्या अटकेसाठी विशेष मोहीम हाती घेतली आहे.

रविंद्र भिमराव केळगंद्रे हे ठाण्यातील मानपाड्यातील रहिवाशी आहे. प्रभादेवीच्या सेनापती बापट मार्ग, कॅलिबर केमिकल्स या खाजगी कंपनीत ते सेल्स अ‍ॅण्ड मार्केटिंग विभागात मॅनेजर म्हणून कामाला आहे. 24 एप्रिलला ते त्यांच्या कार्यालयात होते. यावेळी त्यांचा मोबाईल क्रमांक व्हीआयपी युसी स्टॉक वेल्थ शेअरिंग नावाच्या एका व्हॉटअप ग्रुपमध्ये अ‍ॅड करणत आला होता. हा ग्रुप एका खाजगी कंपनीचा होता. त्यात शेअरसंदर्भातील माहिती दिली जात होती. ग्रुपमधील सभासद त्यांनी गुंतवणुक केलेल्या शेअरसंदर्भात चर्चा करत होते. कोणाला कुठल्या शेअरमध्ये किती फायदा झाला, आणखीन कुठल्या शेअरमध्ये गुंतवणुक केल्यास आपल्याला आणखीन फायदा होईल याबाबत ही चर्चा असायची. त्यामुळे त्यांनी शेअरमध्ये गुंतवणुकीचा निर्णय घेतला होता.

याबाबत त्यांनी ग्रुप अ‍ॅडमिनकडे त्यांची इच्छा व्यक्त केली होती. यावेळी अ‍ॅडमिनने त्यांच्या आधारकार्ड, पॅनकार्ड, बँक खात्याची माहिती घेतली होती. तसेच त्यांना सुरुवातीला दोन लाखांची गुंतवणुकीचा सल्ला दिला होता. त्यामुळे त्यांनी अ‍ॅडमिनच्या सांगण्यावरुन कंपनीचा अ‍ॅप डाऊनलोड करुन स्वतचे एक ट्रेडिंग खाते बनविले होते. त्यानंतर त्यांनी विविध शेअरमध्ये गुंतवणुक करण्यास सुरुवात केली होती. या गुंतवणुकीवर त्यांना चांगला फायदा होत असल्याचे अ‍ॅपवरुन दिसत होते. त्यामुळे त्यांनी शेअरमध्ये आणखीन गुंतवणुक केली होती. 31 जुलै 2025 रोजी त्यांना त्यांच्या गुंतवणुकीवर 57 लाख रुपयांचा फायदा झाल्याचे दिसून आले होते. याच दरम्यान ग्रुप अ‍ॅडमिनने त्यांना वेगवेगळ्या शेअरची माहिती सांगून त्यांना त्यात गुंतवणुक केल्यास चांगला परतावा मिळेल असे आमिष दाखविले होते. त्यामुळे त्यांनी मे ते ऑगस्ट 2025 या कालावधीत विविध शेअरमध्ये पाच कोटी अकरा लाखांची गुंतवणुक केली होती.

या गुंतवणुकीवर त्यांना चांगला फायदा झाला होता. त्यामुळे त्यांनी काही रक्कम त्यांच्या बँक खात्यात ट्रान्स्फर करण्याचा प्रयत्न केला होता, मात्र वारंवार प्रयत्नही त्यांना ती रक्कम स्वतच्या बँक खात्यात ट्रान्स्फर करता आली नाही. त्यामुळे त्यांनी ग्रुप अ‍ॅडमिनकडे विचारणा केली होती, यावेळी त्यांनी त्यांना टॅक्स म्हणून काही रक्कम जमा करण्यास सांगितली, ही रक्कम ट्रान्स्फर केल्याशिवाय त्यांची रक्कम त्यांना त्यांच्या बँक खात्यात ट्रान्स्फर करता येणार नाही. त्यानंतर त्यांनी त्यांना प्रतिसाद देणे बंद केले होते. मोबाईल स्विच ऑफ केले होते.

शेअर गुंतवणुकीवर चांगला परतावा देण्याचे आमिष दाखवून या सायबर ठगांनी त्यांना विविध शेअरमध्ये गुंतवणुक करण्यास प्रवृत्त केले. मात्र गुंतवणुक रक्कमेसह परताव्याची रक्कम न देता त्यांची फसवणुक केली होती. फसवणुकीचा हा प्रकार लक्षात येताच रविंद्र केळगंद्रे यांनी सायबर हेल्पलाईनसह मध्य प्रादेशिक विभागाच्या सायबर ठगाविरुद्ध तक्रार केली होती. या तक्रारीची शहानिशा केल्यानंतर अज्ञात सायबर ठगाविरुद्ध पोलिसांनी भारतीय न्याय सहिता आणि आयटीच्या विविध कलमांतर्गत गुन्हा दाखल केला होता. या गुन्ह्यांचा तपास सुरु असून अद्याप कोणालाही अटक झाली नसल्याचे पोलिसांनी सांगितले.