शेअर गुंतवणुकीच्या बहाण्याने वयोवृद्धाची 1.68 कोटीची फसवणुक

मुंबई क्राईम टाइम्स डॉट कॉम
4 नोव्हेंबर 2025
मुंबई, – चांगल्या परताव्या आमिषाने शेअरमध्ये गुंतवणुक करण्यास प्रवृत्त करुन एका 61 वर्षांच्या सेवानिवृत्त वयोवृद्धाची अज्ञात सायबर ठगाने 1 कोटी 68 लाख रुपयांची फसवणुक केल्याची घटना चेंबूर परिसरात उघडकीस आली आहे. बोगस व्हॉटअप ग्रुप आणि ट्रेडिंग अ‍ॅपच्या सहाय्याने या ठगाने ही फसवणुक केल्याचे तपासात उघडकीस आले आहे. याप्रकरणी वयोवृद्धाच्या तक्रारीवरुन पाच अज्ञात सायबर ठगाविरुद्ध पूर्व सायबर प्रादेशिक सायबर सेल पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे.

यातील तक्रारदार वयोवृद्ध गेल्या 27 वर्षांपासून चेंबूर परिसरात त्यांची पत्नी आणि दोन मुलांसोबत राहतात. ते एचपीसीएल कंपनीतून जुलै 2025 मध्ये वरिष्ठ अ‍ॅडमीन सहाय्यक तर त्यांची 59 वर्षांची पत्नी महानगरपालिकेच्या शाळेतून शिक्षिका म्हणून निवृत्त झाली आहे. जून महिन्यांत ते त्यांच्या घरी होते. यावेळी त्यांचा व्हॉटअप क्रमांक एम4 वेल्थ क्रिअटर या कंपनीच्या व्हॉटअप ग्रुपमध्ये अ‍ॅड करण्यात आला होता. या गु्रपमध्ये शेअर ट्रेडिंगविषयी माहिती दिली जात होती. कुठल्या शेअरमध्ये गुंतवणुक केल्यास गुंतवणुकदरांना किती फायदा होईल याबाबत माहिती दिली जात होती.

कंपनी सेबी रजिस्ट्रर असल्याचा दावा करुन ग्रुप अ‍ॅडमीनसह इतरांनी अनेकांना कंपनीच्या माध्यमातून शेअरमध्ये गुंतवणुक करण्यास प्रवृत्त केले होते. अशाच प्रकारे त्यांनाही शेअरमध्ये गुंतवणुक करण्यास प्रवृत्त करुन त्यांना चांगला परतावा देण्याचे आश्वास देण्यात आले होते. एकूण व्हॉटअप गु्रुपमधील माहिती जाणून घेतल्यानंतर त्यांनीही शेअरमध्ये गुंतवणुकीचा निर्णय घेतला होता. ठरल्याप्रमाणे त्यांनी जून ते ऑक्टोंबर 2025 या कालावधीत विविध शेअरमध्ये 1 कोटी 68 लाख 14 हजार रुपयांची गुंतवणुक केली होती.

या गुंतवणुकीवर त्यांना चांगला फायदा झाल्याचे दिसून येत होता. त्यामुळे त्यांनी काही रक्कम विड्राल करण्याचा प्रयत्न केला, मात्र बरेच प्रयत्न करुनही त्यांना ती रक्कम काढता आली नाही. याबाबत ग्रुप अ‍ॅडसीनसह इतर चौघांकडे विचारणा करुनही त्यांनी त्यांना प्रतिसाद दिला नाही. या टोळीने संगनमत करुन त्यांना शेअरमध्ये गुंतवणुक करण्यास प्रवृत्त करुन त्यांची मूळ रक्कमेसह परताव्याची रक्कम न देता त्यांची फसवणुक करण्यात आली होती.

हा प्रकार उघडकीस येताच त्यांनी पूर्व सायबर सेल पोलिसांत तक्रार केली होती. या तक्रारीची शहानिशा केल्यानंतर संबंधित पाचही सायबर ठगाविरुद्ध पोलिसांनी फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा तपास सुरु असल्याचे सांगून एका अधिकार्‍याने ज्या बँक खात्यात ही रक्कम जमा झाली आहे, त्या बँक खात्यासह खातेदारांची माहिती काढली जात असल्याचे सांगितले.