शेअर ट्रेडिंगच्या बहाण्याने गंडा घालणार्‍या आरोपीस अटक

मुंबई क्राईम टाईम्स डॉट कॉम
3 डिसेंबर 2025
मुंबई, – शेअर ट्रेडिंगच्या बहाण्याने एका वयोवृद्धाची 1 कोटी 35 लाखांची फसवणुक कटातील आरोपीस उत्तर प्रादेशिक विभागाच्या सायबर सेल पोलिसांनी अटक केली. वसीम मेहफल शेख असे या आरोपीचे नाव असून तो काही सायबर ठगांच्या संपर्कात असल्याचे, त्यांच्यासाठी त्याने विविध बँकेत खाती उघडले होते. त्याने उघडलेल्या बँक खात्यात वेगवेगळ्या ऑनलाईन फसवणुकीच्या गुन्ह्यांतील कोट्यवधी रुपयांची जमा झाल्याचे तपासात उघडकीस आले आहे. अटकेनंतर त्याला बोरिवलीतील लोकल कोर्टाने पोलीस कोठडी सुनावली आहे.

76 वर्षांचे वयोवृद्ध तक्रारदार मनोहर रामचंद्र नार्वेकर हे गोरेगाव येथे राहतात. ते गोवा येथील स्टार फ्लेक्स या कंपनीतून निवृत्त झाले असून सध्या एका खाजगी कंपनीसाठी मॅकनिकल इंजिनिअर सल्लागार म्हणून काम करतात. त्यांच्याकडे तीन वेगवेगळ्या बँकेचे डिमॅट खाते असून त्यांनी विविध कंपन्याचे शेअरची खरेदी-विक्री केली होती. ते नियमित शेअरमार्केटमध्ये गुंतवणुक करत असल्याने त्यांना त्यांचे चांगले ज्ञान आहे. अनेकदा ते सोशल मिडीयावर शेअरबाबत माहिती जाणून घेण्याचा प्रयत्न करत होते.

याच दरम्यान त्यांना एका व्हॉटअप ग्रुपमध्ये जोडण्यात आले होते. या ग्रुपमध्ये 108 सभासद होते तर हा ग्रुप एका नामांकित कंपनीशी संबंधित असल्याचे त्यांना भासविण्यात आले होते. त्यामुळे त्यांनी ती लिंक ओपन करुन त्यात त्यांची वैयक्तिक माहिती अपलोड केली होती. काही दिवसांनी त्यांना ग्रुपमधील वरिष्ठ अधिकार्‍यांनी संपर्क साधून त्यांना त्यांच्या कंपनीमार्फत देश-विदेशातील विविध शेअरमध्ये गुंतवणुकीचा सल्ला देताना त्यांना चांगला परताव्याचे आमिष दाखविले होते. त्यामुळे त्यांनी काही शेअरमध्ये गुंतवणुक केली होती. या गुंतवणुकीवर त्यांना चांगला फायदा झाला होता.

ही रक्कम त्यांच्या बँक खात्यात ट्रान्स्फर झाल्याने त्यांना कंपनीवर विश्वास निर्माण झाला होता. त्यामुळे त्यांनी एप्रिल ते जून 2025 या कालावधीत देश-विदेशातील वेगवेगळ्या शेअरमध्ये 1 कोटी 35 लाख 19 हजार 500 रुपयांची गुंतवणुक केली होती. या गुंतवणुकीवर त्यांना प्रचंड फायदा झाला होता. त्यामुळे त्यांनी काही रक्कम स्वतच्या बँक खात्यात ट्रान्स्फर करण्याचा प्रयत्न केला, मात्र वारंवार प्रयत्नही करुनही त्यांना ही रक्कम ट्रान्स्फर करता आली नाही. याबाबत ग्रुप अ‍ॅडमिनकडे तक्रार केल्यानंतर त्यांनी त्यांना आणखीन रक्कम शेअरमध्ये गुंतवणुक करण्यास सांगितले. त्यांनी गुंतवणुक केली नाहीतर त्यांना त्यांची मूळ रक्कम आणि परताव्याची रक्कम मिळणार नाही अशी धमकी दिली होती.

फसवणुकीचा हा प्रकार लक्षात येताच त्यांनी पश्चिम प्राादेशिक सायबर सेल पोलिसांत तक्रार केली होती. या तक्रारीची शहानिशा केल्यानंतर चार अज्ञात सायबर ठगाविरुद्ध पोलिसांनी फसवणुकीसह आयटी कलमांतर्गत गुन्हा नोंदविला होता. गुन्हा दाखल होताच पोलिसांनी संबंधित बँक खात्यासह खातेदारांची माहिती काढण्यास सुरुवात केली होती. तांत्रिक माहितीवरुन पोलिसांनी वसीम शेखला ताब्यात घेतले.

या गुन्ह्यांत त्याचा सहभाग उघडकीस आला होता. त्याने सायबर ठगांना बँक खाती पुरविल्याचे उघडकीस आले आहे. याच बँक खात्यात फसवणुकीची रक्कम झाली होती. ही रक्कम सायबर ठगांना दिल्यानंतर त्याला ठराविक रक्कमेचे कमिशन प्राप्त झाले होते. त्याच्या बँक खात्याचा इतर फसवणुकीच्या गुन्हयांत वापर झाल्याचे तपासात उघडकीस आले आहे. अटकेनंतर त्याला बोरिवलीतील लोकल कोर्टात हजर करण्यात आले होते. यावेळी कोर्टाने त्याला पोलीस कोठडी सुनावली आहे.