शेअर गुंतवणुकीच्या नावाने गंडा घालणार्‍या आरोपीस अटक

मुंबई क्राईम टाइम्स डॉट कॉम
३ डिसेंबर २०२४
मुंबई, – शेअरमार्केटमधील गुंतवणुकीवर चांगला परतावा देतो असे आमिष दाखवून एका केंद्रीय अधिकार्‍याची सुमारे बारा लाखांची फसवणुक केल्याप्रकरणी वॉण्टेड असलेल्या एका आरोपीस पश्‍चिम प्रादेशिक विभागाच्या सायबर सेल पोलिसांनी अटक केली आहे. विजय रजनीकांत साहा या आरोपीचे नाव असून त्याच्यावर सायबर ठगांना बँक खाती पुरविल्याचा आरोप आहे. त्याच्या चौकशीतून इतर काही आरोपींचे नावे समोर आले असून त्यांच्या अटकेसाठी पोलिसांनी विशेष मोहीम हाती घेतली आहे.

पवनकुमार उपेंद्रनारायण मंडल हे अंधेरीतील वर्सोवा परिसरात राहत असून केंद्रीय मत्तस्याकी शिक्षा संस्थानमध्ये कामाला आहे. २६ जूनला ते त्यांच्या घरी होते. यावेळी त्यांच्या मोबाईलमध्ये एक लिंक आली होती. ही लिंक ओपन केल्यानंतर त्यांना एका व्हॉटअप ग्रुपमध्ये सामिल करण्यात आले होते. शेअरमार्केटसंदर्भातील हा ग्रुप होता. या गुपमध्ये नियमित शेअरसंदर्भातील माहिती दिली जात होती. त्यामुळे ते प्रत्येक माहिती जाणून घेण्याचा प्रयत्न करत होते. काही दिवसांनी त्यांना ग्रुप ऍडमिनने शेअरमार्केटमध्ये गुंतवणुकीचा सल्ला देताना त्यांच्या गुंतवणुकीवर चांगला परतावा देण्याचे आश्‍वासन दिले होते. ग्रुपमधील अनेक सभासदांनी शेअरमध्ये गुंतवणुक केली होती, त्यात त्यांना चांगला फायदा होत असल्याचे दिसून आले होते.

याच आमिषाला बळी पडून त्यांनी शेअरमघ्ये गुंतवणुकीचा निर्णय घेत ऍडमिनच्या सांगण्यावरुन जून ते सप्टेंबर २०२४ या कालावधीत विविध बँक खात्यात बारा लाख चौदा हजारांची फसवणुक केली होती. काही दिवसांतच या गुंतवणुकीवर त्यांना सोळा लाखांचा नफा झाल्याचे दिसून आले होते. त्यामुळे त्यांनी ती रक्कम त्यांच्या बँक खात्यात ट्रान्स्फर करण्याची विनंती केली होती, मात्र ही रक्कम ट्रान्स्फर करण्यासाठी त्यांच्याकडे ग्रुप ऍडमिनने तीन लाख रुपये भरावे लागतील असे सांगितले होते. त्यांनी ती रक्कम ट्रान्स्फर न करता त्यांच्याकडे मूळ रक्कमेसह परताव्याची मागणी केली होती. मात्र त्यांना ऍडमिनकडून काहीच प्रतिसाद मिळत नव्हता. फसवणुकीचा हा प्रकार लक्षात येताच त्यांनी सायबर सेल पेालिसांत तक्रार केली होती.

याप्रकरणी फसवणुकीसह आयटी कलमांतर्गत गुन्हा दाखल होताच पोलिसांनी तपास सुरु केला होती. ज्या बँक खात्यात ही रक्कम ट्रान्स्फर झाली होती, त्या बँक खात्याची माहिती काढून पोलिसांनी तांत्रिक माहितीवरुन विजय साहा याला चौकशीसाठी ताब्यात घेतले होते. चौकशीत या गुन्ह्यांत सहभाग उघडकीस आला होता. त्यानंतर त्याला पोलिसांनी अटक केली. अशा प्रकारे फसवणुक करणार्‍या सायबर ठगांना विजयने विविध बँकेत खाती उघडून दिले होते. याच बँक खात्यात फसवणुकीची रक्कम जमा होत होती. याकामी त्याला या ठगांनी ठराविक रक्कमेचे कमिशन दिल्याचे तपासात उघडकीस आले आहे.