मद्यप्राशन करुन स्टंटबाजी करणे जिवावार बेतली

मुंबई क्राईम टाइम्स डॉट कॉम
२७ डिसेंबर २०२४
मुंबई, – मद्यप्राशन करुन रिक्षाच्या बाहेर लटकून स्टंटबाजी एका तरुणाच्या जिवावर बेतल्याची घटना कांदिवली परिसरात घडली. स्टंटबाजी करताना रस्त्यावर पार्क केलेल्या टेम्पोला जोरात धडक लागून झालेल्या अपघातात भूषण बांदेकर या तरुणाचा मृत्यू झाला. याप्रकरणी त्याचा रिक्षाचालक मित्र शिवकुमार नटराज शेट्टी याच्याविरुद्ध कांदिवली पोलिसांनी हलगर्जीपणाने रिक्षा चालवून मित्राच्या मृत्यूस कारणीभूत ठरल्याप्रकरणी गुन्हा दाखल केला होता. याच गुन्ह्यांत त्याला पोलिसांनी अटक केली.

हा अपघात बुधवारी २५ डिसेंबरला रात्री साडेदहा वाजता कांदिवलीतील एम. जी रोडवरील सागर मार्बल आणि ग्रेनाईट्स शॉपसमोर झाल्याचे पोलिसांनी सांगितले. नंदीनी भूषण बांदेकर ही महिला मालाड, मार्वे रोडवर राहत असून तिचे पती भूषण हा टेम्पोचालक म्हणून करतो. बुधवारी रात्री साडेअकरा वाजता तिचा दिर राकेश शेट्टीने तिला कॉल करुन तिच्या पतीचा अपघात झाला आहे. त्याला उपचारासाठी कांदिवलीतील शताब्दी हॉस्पिटलमध्ये नेण्यात आल्याचे सांगितले. त्यामुळे ती शताब्दी हॉस्पिटलमध्ये गेली होती. तिथे गेल्यानंतर तिला आयसीयूबाहेर तिच्या पतीचा मित्र शिवकुमार शेट्टी हा दिसला.

चौकशीदरम्यान २५ डिसेंबरला भूषण हा त्याचे दोन मित्रांसह शिवकुमार शेट्टी याच्यासोबत हिंदुस्तान नाका येथे पार्टी करण्यासाठीआले होते. तिथे भूषणने भरपूर मद्यप्राशन केले होते. रिक्षातून जाताना भूषण हा बाहेर लटकून स्टंटबाजी करत होता. ही रिक्षा कांदिवलीतील सागर मार्बल व गे्रनाईट्स शॉपसमोरुन जात असताना बाजूला पार्क केलेल्या एका टेम्पोची त्याची धडक लागली होती. त्यात तो गंभीररीत्या जखमी झाला होता. त्यामुळे त्याला शिवकुमार हा रिक्षातून शताब्दी हॉस्पिटलमध्ये घेऊन आला होता. त्याची प्रकृती गंभीर असल्याने त्याच्यावर आयसीयूमध्ये उपचार सुरु करण्यात आले होत. तिथेच उपचार सुरु असताना त्याचा मृत्यू झाला होता.

ही माहिती समजताच कांदिवली पोलिसांनी घटनास्थळी धाव घेतली होती. याप्रकरणी नंदीनी बांदेकर हिची पोलिसांनी जबानी नोंदवून घेतली होती. भूषण आणि शिवकुमार यांनी मद्यप्राशन करताना भूषणला रिक्षाच्या बाहेर स्टंटबाजी करण्यास रोखले नाही. रिक्षा चालवून त्याने त्याला एका टेम्पोला धडक देण्यास कारणीभूत ठरला होता. या अपघातात भूषणचा मृत्यू झाला होता. भूषणचय मृत्यूस शिवकुमार शेट्टी हाच जबाबदार असल्याने तिने त्याच्याविरुद्ध तक्रार केली होती. या तक्रारीनंतर शिवकुमार शेट्टीविरुद्ध हलगर्जीपणाने मृत्यूस कारणीभूत ठरल्याप्रकरणी गुन्हा दाखल केला होता. याच गुन्ह्यांत नंतर त्याला पोलिसांनी अटक केली.