दिड कोटीच्या फसवणुकीप्रकरणी चित्रपट निर्मात्याला अटक

मुंबई क्राईम टाईम्स डॉट कॉम
24 सप्टेंबर 2025
मुंबई, – सुमारे दिड कोटीच्या फसवणुकीच्या गुन्ह्यांत वॉण्टेड असलेल्या एका बंगाली चित्रपटाच्या निर्मात्याला बांगुरनगर पोलिसांनी अटक केली. श्यामसुंदर स्वप्नकुमार डे असे या 47 वर्षांच्या निर्मात्याचे नाव असून अटकेनंतर त्याला बोरिवलीतील लोकल कोर्टात हजर करण्यात आले होते. यावेळी कोर्टाने त्याला शुक्रवार 26 सप्टेंबरपर्यंत पोलीस कोठडी सुनावली आहे. त्याच्यावरा ओटीटी प्लॅटफॉर्मवर प्रसारीत होणार्‍या सोळा नवीन चित्रपटाचे प्रसारण हक्क आणि वायकॉम अठरा ओटीटीवर संबंधित चित्रपट प्रदर्शित करण्याच्या व्यवसायात गुंतवणुकीचे आमिष दाखवून एका हिंदीसह भोजपुरी व तमिळ मालिका आणि चित्रपटातील एका सिनेअभिनेत्रीची 1 कोटी 58 लाखांची फसवणुक केल्याचा आरोप आहे. याच गुन्ह्यांत त्याच्यासोबत त्याचे दोन पार्टनर सारर्थी सुजीतकुमार गुहा आणि नेताई बाबूलाल मोडल हे सहआरोपी असल्याचे पोलिसांनी सांगितले. श्यामसुंदर डे यांच्याविरुद्ध दाखल झालेला हा दुसरा फसवणुकीचा गुन्हा असून यापूर्वी त्याच्याविरुद्ध कोलकाता येथे एका व्यावसायिकाची सुमारे पावणेतीन कोटीची फसवणुक केल्याप्रकरणी गुन्हा दाखल झाला होता.

पूजा निखिल बॅनर्जी ही सिनेअभिनेत्री असून ती सध्या तिच्या कुटुंबियांसोबत मालाड येथे राहते. तिने आतापर्यंत अनेक हिंदी, भोजपुरी आणि तामिळ मालिका आणि चित्रपटात काम केले आहे. त्यात तुझ संग प्रीत लगाई संजना, कुमकुम भाग्य या मालिकासह तमिळ चित्रपट वीदू थेडा या चित्रपटाचा समावेश आहे. एप्रिल महिन्यांत तिच्याकडे बंगाली निर्माते शाम सुंदर डे यांनी एक प्रस्ताव आणला होता. त्यात त्यांनी तिच्यासह तिचे पती कुणाल वर्मा यांना 2025 साली ओटीटी प्लॅटफॉर्मवर प्रसारीत होणार्‍या सोळा चित्रपटाचे प्रसारणाचे हक्क मिळविणे आणि ते चित्रपट वायकॉम अठरा ओटीटीवर प्रदर्शित करण्याच्या व्यवसायात गुंतवणुकीबाबत होता. या व्यवसायात गुंतवणुक केल्यास त्यांच्यासह त्याच्या कंपनीला चांगला आर्थिक फायदा होईल, त्यामुळे त्यांनी त्यांच्या कंपनीसोबत व्यवसायात गुंतवणुक करण्याबाबत विनंती केली होती.

ही ऑफर चांगली वाटल्याने पूजा बॅनर्जी व तिचे पती कुणाल वमा्र यांनी त्यांच्यासोबत गुंतवणुकीचा निर्णय घेतला होता. ठरल्याप्रमाणे त्यांनी स्वतची शॅडो फिल्मस नावाची एक कंपनी सुरु केली होती. या कंपनीने शाम डे यांच्या कंपनीसोबत एक करार केला होता. या करारानंतर तिने त्यांना गुंतवणुकीसाठी 1 कोटी 68 लाखांची गुंतवणुक केली होती. हा संपूर्ण व्यवहार 9 एप्रिल ते 25 मे 2025 या कालावधीत झाला होता. मात्र ठरल्याप्रमाणे शाम डे व इतर दोघांनी चित्रपटाच्या प्रसारणाचे हक्क मिळवून दिले नाही. गुंतवणुकीसाठी दिलेल्या पैशांचा वैयक्तिक फायद्यासाठी वापर करुन पूजा बॅनजी आणि कुणाल वर्मा यांची फसवणुक केली होती. हा प्रकार लक्षात येताच तिने त्यांच्याकडे पैशांची मागणी सुरु केली होती, यावेळी त्याने त्यांना दहा लाख रुपये परत केले.

मात्र नंतर तिला प्रतिसाद देणे बंद केले. विविध कारण सांगून तिला टाळण्याचा प्रयत्न केला होता. फसवणुकीचा हा प्रकार लक्षात येताच तिने बांगुरनगर पोलिसांत तक्रार केली होती. या तक्रारीची शहानिशा केल्यानंतर बंगाली चित्रपटाचे निर्माते शाम डे व त्यांचे दोन सहकारी सारर्थी गुहा आणि नेताई मोंडल या तिघांविरुद्ध पोलिसांनी अपहारासह फसवणुकीचा गुन्हा दाखल केला होता. याच गुन्ह्यांत तिघांना पोलिसांनी पाहिजे आरोपी दाखविले होते. त्यांचा पोलिसांकडून शोध सुरु होता. ही शोधमोहीम सुरु असताना श्यामसुंदर डे याला कोलकाता येथून बांगुरनगर पोलिसांच्या एका विशेष पथकाने ताब्यात घेतले होते.

चौकशीत त्याने ही फसवणुक केल्याची कबुली दिली होती. त्यानंतर त्याला पोलिसांनी अटक केली. याच गुन्ह्यांत तो सध्या पोलीस कोठडीत असून त्याची पोलिसांकडून चौकशी सुरु आहे. तपासात शाम डे याच्याविरुदध अशाच प्रकारे कोलकाता येथील एका पोलीस ठाण्यात फसवणुकीचा गुन्हा दाखल आहे. ओटीटी प्लॅटफॉर्मवर गुंतवणुकीच्या नावाने त्याने मनिष सिंघनिया नावाच्या एका व्यक्तीची पावणेतीन कोटीची फसवणुक केली होती. त्यानंतर शाम डेविरुद्ध दाखल झालेला हा दुसरा गुन्हा असल्याचे पोलिसांनी सांगितले.