नैरोबीहून आलेल्या गिनी महिलेस कोकेन तस्करीप्रकरणी अटक

मुंबई क्राईम टाईम्स डॉट कॉम
15 एप्रिल 2025
मुंबई, – नैरोबीहून आलेल्या एका गिनी महिलेस ड्रग्ज तस्करीप्रकरणी छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाने अटक केली. या महिलेच्या बॅगेतून या अधिकार्‍यांनी2178 ग्रॅम वजनाच कोकेन जप्त केले असून या कोकेनची आंतरराष्ट्रीय बाजारात किंमत 21 कोटी 78 लाख रुपये इतकी आहे. तिच्याविरुद्ध एनडीपीएस कलमांतर्गत गुन्हा दाखल करण्यात आला असून याच गुन्ह्यांत अटकेनंतर तिला किल्ला कोर्टाने चौदा दिवसांची न्यायालयीन कोठडी सुनावण्यात आली आहे.

नैरोबी येथून येणार्‍या विमानातून काही प्रवाशी कोकेनची तस्करी करणार असल्याची माहिती डीआरआयच्या अधिकार्‍यांना मिळाली होती. त्यामुळे नैरोबीहून येणार्‍या प्रत्येक संशयित प्रवाशांसह त्यांच्या सामानाची तपासणी सुरु करण्यात आली होती. ही कारवाई सुरु असताना गिनी देशाची नागरिक असलेल्या या महिलेला या अधिकार्‍यांनी चौकशीसाठी ताब्यात घेतले होते. तिच्या बॅगेची तपासणी केल्यानंतर तीन पॅकेटमध्ये पांढर्‍या रंगाची पावडर असल्याचे दिसून आले. त्यानंतर या अधिकार्‍यांनी एनडीपीएस फिल्ड टेस्ट किट वापरुन त्याची चाचणी केली होती. त्यात ते कोकेन असल्याचे उघडकीस आले.

या तिन्ही पॅकेटमधून 21 कोटी 78 लाखांचे 2 किलो 178 ग्रॅम वजनाचे कोकेन नंतर जप्त करण्यात आले. याच गुन्ह्यांत तिच्याविरुद्ध एनडीपीएस कलमांतर्गत गुन्हा दाखल करुन या अधिकार्‍यांनी तिला अटक केली. अटकेनंतर तिला किल्ला कोर्टात हजर करण्यात आले होते. यावेळी कोर्टाने तिला न्यायालयीन कोठडी सुनावली आहे.