अमेरिकन मगरीच्या पिल्लांच्या तस्करीचा पर्दाफाश

मुंबई क्राईम टाईम्स डॉट कॉम
२८ सप्टेंबर २०२४
मुंबई, – मुंबईतील छत्रपती शिवाजी महाराज आंतराष्ट्रीय विमानतळावर अमेरिकन मगरीच्या पिल्लांच्या तस्करीचा हवाई गुप्तचर विभागाच्या अधिकार्‍यांनी पर्दाफाश केला. याप्रकरणी बँकॉकहून आलेल्या दोन प्रवाशांना अटक करण्यात आली असून त्यांच्याकडून मगरीच्या पाच पिल्लांची सुटका करण्यात आली आहे. या पिल्लांना पुन्हा बँकॉंकला पाठविण्यात आले आहे. अटक प्रवाशांमध्ये मोहम्मद रेहान मदनी इब्राहिम अजमेरी आणि हमजा युसूफ मंसुरी यांचा समावेश असून अटकेनंतर या दोघांनाही शनिवारी दुपारी किल्ला कोर्टाने चौदा दिवसांची न्यायालयीन कोठडी सुनावली आहे.

आंतरराष्ट्रीय विमानतळावर विदेशी चलनासह सोने तस्करीसाठी कस्टम अधिकार्‍यांनी विशेष मोहीम हाती घेतली असताना शुक्रवारी मगरीच्या पिल्लांचा पर्दाफाश करण्यात या अधिकार्‍यांना यश आले होते. थायलंडच्या बॅकॉंकहून मोहम्मद रेहान हा प्रवाशी विस्तारा एअरवेजमधून आंतरराष्ट्रीय विमानतळावर आला होता. संशयावरुन त्याला चौकशीसाठी ताब्यात घेतल्यानंतर त्याच्याकडील सामानाची झडती घेण्यात आले होते. त्यात या अधिकार्‍यांना एक बॉक्स सापडला, त्यात अमेरिकन मगरीच्या पाच पिल्लांना ताब्यात घेण्यात आले. चौकशीदरम्यान त्याला ते पिल्ल त्याच्यासोबत प्रवास करणार्‍या हमजा मंसुरीने दिल्याचे उघडकीस आले होते. तो विमानतळाबाहेर गेला होता, त्याला विमानतळाबाहेरच तो बॉक्स द्यायचे होते. त्यानंतर या पथकाने विमानतळावर मोहम्मद रेहानची वाट पाहत उभा असलेल्या हमजा मंसुरीला ताब्यात घेतले. या दोघांनाही नंतर पोलिसांनी वन्य प्राण्यांच्या तस्करीच्या गुन्ह्यांत अटक केली. पाच ते सात इंच लांबीची ही मगरीची पिल्ले पाण्याविना अस्वस्थ झाली होती. त्यामुळे या अधिकार्‍यांनी रेस्किंक असोशिएशन फॉर वाइल्ड लाईफ वेल्फेअर या प्राणीमित्र संघटनेला बोलावून या पिल्लांची तपासणी केली, त्यानंतर त्यांच्यावर प्राथमिक औषधोपचार करण्यात आले. जप्त केलेल्या पिल्लांना पुन्हा बँकॉंकला पाठविण्यत आले.