1 कोटी 56 लाखांचा हिर्‍यांचा अपहार करुन फसवणुक
हिरे व्यापार्‍यांना गंडा घालणार्‍या बंधूंविरुद्ध गुन्हा दाखल
मुंबई क्राईम टाईम्स डॉट कॉम
20 मार्च 2025
मुंबई, – विक्रीसाठी घेतलेल्या 1 कोटी 56 लाखांच्या हिर्‍यांचा अपहार करुन दोन हिरे व्यापार्‍यांची फसवणुक झाल्याचा प्रकार उघडकीस आला आहे. याप्रकरणी एका खाजगी कंपनीच्या हिरे व्यापारी असलेल्या दोन बंधूंविरुद्ध बीकेसी पोलिसांनी अपहारासह फसवणुकीचा गुन्हा दाखल केला आहे. चिराग विराडिया आणि योगेश विराडिया अशी या दोन बंधूंची नावे आहेत. हिरे घेऊन ते दोघेही पळून गेल्याने त्यांच्या अटकेसाठी बीकेसी पोलिसांनी विशेष मोहीम हाती घेतली आहे. या दोघांनी अशाच प्रकारे इतर काही हिरे व्यापार्‍यांना कोट्यवधी रुपयांना गंडा घातल्याचे तपासात उघडकीस आले आहे. त्यामुळे फसवणुकीचा हा आकडा आणखीन वाढण्याची शक्यता वर्तविण्यात येत आहे.
प्रितेश विनोदभाई शाह हे हिरे व्यापारी असून ते गिरगाव येथे त्यांच्या कुटुंबियांसोबत राहतात. त्यांची मारुती जेम्स नावाची एक कंपनी असून याच कंपनीत त्यांच्यासह इतर भागीदार आहेत. या कंपनीचे वांद्रे येथील बीकेसी, भारत डायमंड बोर्समध्ये एक कार्यालय आहे. याच कार्यालयातून त्यांचे सर्व आर्थिक व्यवहार चालते. त्यांचे महेशभाई भवानभाई परमार हे व्यावसायिक मित्र असून त्यांची राजेश एक्सपोर्ट नावाची एक कंपनीआहे. त्यांचाही हिरे खरेदी-विक्रीचा व्यवसाय आहे. काही महिन्यांपूर्वी त्यांचा परिचित हिरे ब्रोकर दिनेश सवानी यांनी त्यांची चिराग आणि योगेश विराडिया यांच्याशी ओळख करुन दिली होती. या दोघांची श्री जेम्स नावाची एक कंपनी असून ते दोघेही हिरे खरेदी-विक्रीचे दलालीचे काम करत असल्याचे सांगितले. त्यांच्याकडे हिरे खरेदी करणारी एक चांगली ग्राहक कंपनी आहे. त्यामुळे त्यांना हिर्‍यांची गरज असून व्यवहार पूर्ण झाल्यानंतर त्यांना त्यांच्या हिर्‍यांचे पेमेंट केले जाईल असे सांगून त्यांचा विश्वास संपादन करण्याचा प्रयत्न केला होता. त्यामुळे प्रितेश शाह आणि महेशभाई परमार यांनी या दोघांनाही 420 कॅरेटचे 1 कोटी 56 लाख 82 हजार रुपयांचे हिरे क्रेडिटवर दिले होते.
हा संपूर्ण व्यवहार 17 फेब्रुवारी ते 19 फेब्रुवारी 2025 या कालावधीत झाला होता. चार दिवसांत पेमेंट करण्याचे आश्वासन देऊन या दोघांनी पेमेंट केले नव्हते किंवा क्रेडिटवर घेतलेले हिरे परत केले नव्हते. त्यामुळे या दोघांनी त्यांच्याकडे विचारणा सुरु केली होती. मात्र चिराग आणि योगेश हे दोघेही विविध कारण सांगून त्यांना टाळण्याचा प्रयत्न करत होते. या दोघांनी क्रेडिटवर घेतलेल्या हिर्‍यांची परस्पर विक्री करुन त्यांच्या पेमेंटचा अपहार करुन फसवणुक केली होती. त्यानंतर ते दोघेही मोबाईल बंद करुन पळून गेले होते. चौकशीदरम्यान विराडिया बंधूंनी त्यांच्यासह इतर काही हिरे व्यापार्‍याकडून कोट्यवधी रुपयांचे हिरे विक्रीसाठी क्रेडिटवर घेतले होते, मात्र कोणालाही पेमेंट किंवा हिरे परत केले नव्हते. या सर्वांचे हिरे घेऊन ते दोघेही पळून गेले होते.
हा प्रकार लक्षात येताच प्रितेश शाह यांनी बीकेसी पोलिसांना घडलेला प्रकार सांगून दोन्ही आरोपीविरुद्ध तक्रार केली होती. या तक्रारीची शहानिशा केल्यानंतर चिराग आणि योगेश विराडिया यांच्याविरुद्ध पोलिसांनी अपहारासह फसवणुकीचा गुन्हा दाखल केला आहे. ते दोघेही मालाडच्या अप्पर गोविंदनगर, धु्रव हाईट्स अपार्टमेंटमध्ये राहत असून फसवणुकीनंतर ते दोघेही त्यांच्या घरातून पळून गेल्याचे तपासात उघडकीस आले आहे. या घटनेची वरिष्ठ पोलीस अधिकार्‍यांनी गंभीर दखल घेत बीकेसी पोलिसांसह स्थानिक गुन्हे शाखेला तपासाचे आदेश दिले होते. या आदेशानंतर पळून गेलेल्या विराडिया बंधूंच्या अटकेसाठी पोलिसांनी विशेष मोहीम हाती घेतली आहे.
