एमडी ड्रग्जच्या रेड कॉर्नर नोटीस बजाविलेला आरोपी गजाआड

मुंबई क्राईम टाइम्स डॉट कॉम
24 ऑक्टोंबर 2025
मुंबई, – गेल्या वर्षी सांगलीतील एमडी ड्रग्ज कारखान्यांचा गुन्हे शाखेच्या अधिकार्‍यांनी पर्दाफाश केल्यानंतर या कटातील एका मोस्ट वॉण्टेड आरोपीस अटक करण्यात पोलिसांना यश आले आहे. मोहम्मद सालीम मोहम्मद सुहेल शेख असे या आरोपीचे नाव असून त्याच्याविरुद्ध मुंबई पोलिसांनी रेड कॉर्नर बजविली होती, युएईमधून भारतात प्रत्यार्पण होताच त्याचा आता सीबीआयकडून मुंबई पोलिसांच्या गुन्हे शाखेला देण्यात आला होता. यापूर्वी मुस्तफा मोहम्मद कुन्नावाला या रेड कॉर्नर नोटीस बजविण्यात आलेल्या आरोपीचा जुलै 2025 रोजी युएईमधून ताबा घेण्यात आला होता. अटकेनतर मोहम्मद सालीमला किल्ला कोर्टाने गुरुवार 30 ऑक्टोंबरपर्यंत पोलीस कोठडी सुनावली आहे. त्याच्या अटकेने या गुन्ह्यांतील अटक आरोपींची संख्या आता पंधरा झाली असून त्यात एका महिलेचा समावेश आहे. या आरोपींकडून पोलिसांनी 252 कोटी 28 लाखांचा126 किलो 141 ग्रॅम वजनाचे एमडी ड्रग्ज, 3 कोटी 64 लाख 15 हजाराची कॅश, 1 लाख 50 हजार 420 रुपयांचे सोन्याचे दागिने, 10 लाखांची एक सफेद रंगाची स्कोडा कार, 50 हजाराची एक बाईक, ड्रग्ज बनविण्याचे साहित्य असा 256 कोटी 49 लाख 96 हजार 620 रुपयांचा मुद्देमाल जप्त केला आहे.

16 फेब्रुवारी 2024 रोजी कुर्ला येथे एक महिला एमडी ड्रग्जची विक्रीसाठी येणार असल्याची माहिती गुन्हे शाखेला मिळाली होती. या माहितीनंतर या पथकाने कुर्ला येथील चेंबूर-सांताक्रुज लिंक रोड, सयाजी पगारे चाळ, सीएसटी रोडवरुन पोलिसांनी परवीनबानो शेख या महिलेस अटक केली. तिच्याकडून पोलिसांनी 641 ग्रॅम वजनाचे एमडी आणि ड्रग्ज विक्रीतून आलेली 12 लाख 20 हजार रुपयांची कॅश, दिड लाखांचे सोन्याचे दागिने असा मुद्देमाल जप्त केला होता. तिच्या चौकशीतून एमडी ड्रग्ज विक्रीच्या एका टोळीचा पर्दाफाश करण्यात पोलिसांना यश आले होते. त्यानंतर गुन्हे शाखेच्या अधिकार्‍यांनी वेगवेगळ्या परिसरातून तेराहून अधिक आरोपींना अटक केली होती. या आरोपींच्या चौकशीतून सांगली येथे एमडी ड्रग्ज बनविण्याचा एक कारखाना सुरु असल्याचे उघडकीस आले होते. त्यानंतर या पथकाने महाकाल पोलीस ठाण्याच्या हद्दीतील एका एमडी ड्रग्ज बनविणार्‍या कारखान्यात कारवाई केली होती.

25 मार्च 2025 रोजी केलेल्या या कारवाईत पोलिसांनी कारखान्यातून 245 कोटी रुपयांचा 122 किलो 500 ग्रॅम वजनाचे एमडी ड्रग्जचा साठा जप्त केला होता. मुस्तफा मोहम्मद आणि ताहेर सलीम डोला यांनी सहा महिन्यांपूर्वी सांगली येथे ड्रग्जचा कारखाना सुरु केला होता. या कारखान्यात बनविलेला एमडी मुंबईसह महाराष्ट्रातील विविध शहरात विक्री केला जात होता. जेलमध्ये असताना त्यांची चांगली मैत्री झाली आणि त्यांनी पुन्हा एमडी ड्रग्जची विक्रीचा व्यवसाय सुरु करण्याची योजना बनविली होती. जामिनावर बाहेर आल्यानंतर त्यांनी सांगली येथे एक कारखाना सुरु केला होता. ही टोळी एमडी ड्रग्ज विक्रीसाठी परवीनबानोचा वापर करत होती. महिलांवर शक्यतो कोणीही संशय घेत नसल्याने प्रत्येक डिलसाठी तिला पाठविले जात होते. त्यासाठी तिला चांगले कमिशन मिळत होते.

अटकेनंतर संबंधित विशेष सेशन कोर्टात आरोपपत्र सादर करण्यात आले होते. याच गुन्ह्यांत मोहम्मद सालीम, मुस्तफा मोहम्मद आणि ताहेर डोलाला वॉण्टेड आरोपी दाखविण्यात आले होते. ते दोघेही दुबईहून एमडी ड्रग्जचा कारखाना चालवून त्याच्या सहकार्‍यांमार्फत ड्रग्जची मुंबईसह इतर शहरात विक्री करत होते. त्यामुळे त्याच्या अटकेसाठी मुंबई पोलिसांनी रेड कॉर्नर नोटीस बजाविली होती. त्याच्या अटकेसाठी केंद्रीय पातळीवर विशेष मोहीम हाती घेण्यात आली होती. ही मोहीम सुरु असताना मुस्तफा हा युईएमध्ये असल्याची माहिती प्राप्त होताच त्याला युएईमधून ताब्यात घेण्यात आले होते.

ही कारवाई ताजी असताना आता मोहम्मद सलीम मोहम्मद सुहेलला आता पोलिसांनी अटक केली. मोहम्मद सलीम हा वॉण्टेड आरोपी असून त्याच्याविरुद्ध रेड कॉर्नर नोटीस बजाविण्यात आली होती. काही वर्षांपासून तो युएईमध्ये वास्तव्यास हाता. ही माहिती प्राप्त होताच त्याला एक आठवड्यापूर्वी पोलिसांनी ताब्या घेतले होते. सर्व कायदेशीर कारवाई पूर्ण केल्यानंतर त्याला पुढील चौकशीसाठी भारताकडे सोपविण्यात आले. याच गुन्ह्यांत अटक केल्यानंतर त्याला किल्ला कोर्टात हजर करण्यात आले होते. यावेळी कोर्टाने त्याला 30 ऑक्टोंबरपर्यंत पोलीस कोठडी सुनावली आहे. या गुन्ह्यांत ताहेर डोला हा वॉण्टेड आरोपी असून त्याच्या अटकेसाठी पोलिसांनी विशेष मोहीम हाती घेतली आहे.

ही कामगिरी पोलीस आयुक्त देवेन भारती, सहपोलीस आयुक्त लखमी गौतम, अतिरिक्त पोलीस आयुक्त शैलेश बलकवडे, पोलीस उपायुक्त विशाल ठाकूर, सहाय्यक पोलीस आयुक्त चंद्रकांत जाधव यांच्या मार्गदर्शनाखाली गुन्हे शाखेच्या युनिट सातचे वरिष्ठ पोलीस निरीक्षक आत्माजी सावंत, सहाय्यक पोलीस निरीक्षक धनाजी साठे, पोलीस उपनिरीक्षक स्वप्निल काळे, महेश शेलार, सावंत, पोलीस हवालदार कांबळे, राऊत, पोलीस शिपाई होनमाने, पोलीस हवालदार चालक राठोड यांनी केली.